ءوندىرىستى دامىتۋعا جانە جاڭعىرتۋعا قاجەت ينۆەستيسيا سالىنباي جاتىر. بۇل تۋرالى ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆ ايتتى.
«ۇكىمەت حالىقارالىق قارجى ينستيتۋتتارىمەن، ترانسۇلتتىق كورپوراسيالارمەن جانە وتاندىق كاسىپكەرلەرمەن اراداعى سىندارلى ديالوگتى نىعايتا ءتۇسۋى قاجەت. جالپى، ەلىمىزدىڭ بولاشاقتاعى يندۋستريالىق كەلبەتى قانداي بولادى، قانداي كاسىپورىندار ماڭىزدى ءرول اتقارادى دەگەن ساۋالدارعا جاۋاپ بولۋعا ءتيىس. ياعني، ۋاقىتتىڭ تالابىنا ساي بەلسەندى جۇمىس ىستەۋ كەرەك»، - دەدى قاسىم-جومارت توقايەۆ.
پرەزيدەنتتىڭ ايتۋىنشا، كەلەسى ماڭىزدى مىندەت بۇل – قازىرگى ءوندىرىس ورىندارىن تۇبەگەيلى جاڭعىرتۋ ماسەلەسى.
«بۇل جۇمىستى، ەڭ الدىمەن، ابدەن توزعان مەتاللۋرگيا كومبيناتتارىنان باستاۋ كەرەك. ويتكەنى، ونداعى جاعداي وتە ناشار دەۋگە بولادى. سەبەپ – بارىمىزگە بەلگىلى. ءوندىرىستى دامىتۋعا جانە جاڭعىرتۋعا قاجەتتى ينۆەستيسيا سالىنبايدى. سونىڭ سالدارىنان دايىن ءونىمنىڭ قوسىلعان قۇنى تومەندەيدى، ساپالى جۇمىس ورىندارى ازايادى»، - دەدى مەملەكەت باسشىسى.