قازىرگى تاڭدا 5 اۆتوجول وتكىزۋ پۋنكتىنىڭ 4ء-ى اشىق جانە جۇكتەردى قابىلداپ جاتىر
بۇگىن پرەمەر-مينيستر ءاليحان سمايىلوۆتىڭ توراعالىعىمەن وتكەن داعدارىسقا قارسى شارالار جونىندەگى جەدەل شتابتىڭ كەزەكتى وتىرىسىندا كەدەن سالاسىنداعى ماسەلەلەر قارالدى. بۇل تۋرالى پرەمەر-مينيستردىڭ باسپا ءسوز قىزمەتى حابارلادى.
كەدەندىك-لوگيستيكالىق ينفراقۇرىلىمدى دامىتۋ بويىنشا قابىلدانىپ جاتقان شارالار تۋرالى ق ر قارجى ءبىرىنشى ۆيسە-مينيسترى م. سۇلتانعازييەۆ باياندادى.
قارجى مينيسترلىگىنىڭ مەملەكەتتىك كىرىستەر كوميتەتىنىڭ اقپاراتىنا سايكەس، بۇگىنگى تاڭدا قحر-مەن شەكاراداعى «التىنكول» جانە «دوستىق – تەمىرجول» تەمىرجول وتكىزۋ پۋنكتتەرى شتاتتىق رەجيمدە جۇمىس ىستەپ تۇر.
«قازىرگى تاڭدا 5 اۆتوجول وتكىزۋ پۋنكتىنىڭ 4ء-ى اشىق جانە جۇكتەردى قابىلداپ جاتىر. “قالجات” وتكىزۋ پۋنكتى بۇگىندە ەپيدەميولوگيالىق احۋالعا بايلانىستى قحر جاعىنان جابىق تۇر. تاراپتار قالجات-دۋلاتى قىزمەتىن قايتا باستايتىن ناقتى كۇندەردى كەلىسىپ جاتىر»، — دەدى ق ر قارجى ءبىرىنشى ۆيسە-مينيسترى.
ۇكىمەت قحر-دان قر-عا «نۇر جولى» وتكىزۋ پۋنكتىندە جۇكتەردى اۋىستىرىپ تيەۋ ماسەلەسىن شەشتى، ال ەلەكتروندىق كەزەك رەتكە كەلتىرىلىپ جاتىر. بۇل ورايدا جۇك تاسۋ قىزمەتىنىڭ اقىسى 2 ەسە تومەندەيدى.
كەڭەس بارىسىندا ق ر پرەمەر-مينيسترى قازىرگى جاعدايعا بايلانىستى تۋىندايتىن جانە بولۋى ىقتيمال سىن-تەگەۋرىندەرگە جەدەل دەن قويۋ قاجەتتىگىن اتاپ ءوتتى.
داعدارىسقا قارسى شارالار جونىندەگى جەدەل شتابتىڭ كەلەسى وتىرىسى 9 ناۋرىزدا وتەدى.