ءاليا رۇستەموۆا دەنساۋلىق ساقتاۋ ۆيسە-مينيسترى قىزمەتىنە تاعايىندالدى، دەپ حابارلايدى Aqshamnews ءتىلشىسى ۇكىمەتتىڭ باسپا ءسوز قىزمەتىنە سىلتەمە جاساپ.
ءاليا رۇستەموۆا 1970 جىلى الماتى وبلىسىندا دۇنيەگە كەلگەن. الماتى مەملەكەتتىك مەديسينا ۋنيۆەرسيتەتىن جانە ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىن ءتامامداعان.
ەڭبەك جولىن 1992 جىلى تالعار اۋداندىق اۋرۋحاناسىندا تەراپيەۆت-دارىگەر بولىپ باستاعان.
ونىڭ مانسابىنداعى نەگىزگى كەزەڭدەر:
- 1993–1994 جج. — الماتى قالاسىنداعى №7 ەمحانادا جانە №5 قالالىق كلينيكالىق اۋرۋحانادا تەراپيەۆت؛
- 1994–2000 جج. — الماتىداعى مەديسينالىق عىلىمي ۇيىمداردا كلينيكالىق ورديناتۋرا جانە اسپيرانتۋرادا ءبىلىم العان؛
- 2000–2001 جج. — تالعار مەديسينالىق مەكەمەلەرىندە باس دارىگەردىڭ ورىنباسارى؛
- 2001–2005 جج. — الماتى وبلىسىنىڭ دەنساۋلىق ساقتاۋ باسقارماسىندا باس مامان؛
- 2005–2009 جج. — الماتى وبلىسىنداعى مەديسينالىق قىزمەت كورسەتۋ سالاسىن باقىلاۋ كوميتەتىنىڭ اۋماقتىق بولىمدەرىندە باسشىلىق قىزمەتتەر؛
- 2009–2010 جج. — قىزىلوردا وبلىسى بويىنشا مەديسينالىق قىزمەتتەردى تولەۋ كوميتەتى دەپارتامەنتىنىڭ باسشىسى؛
- 2010–2011 جج. — الماتى قالاسى دەنساۋلىق ساقتاۋ باسقارماسى باسشىسىنىڭ ورىنباسارى؛
- 2011–2012 جج. — الماتى قالاسى بويىنشا مەديسينالىق جانە فارماسيەۆتيكالىق قىزمەتتى باقىلاۋ كوميتەتى دەپارتامەنتىنىڭ ديرەكتورى؛
- 2012–2015 جج. — استاناداعى تراۆماتولوگيا جانە ورتوپەديا عىلىمي-زەرتتەۋ ينستيتۋتىندا يننوۆاسيالىق دامۋ ءبولىمىنىڭ مەڭگەرۋشىسى جانە عالىم حاتشى؛
- 2015–2018 جج. — سولتۇستىك قازاقستان وبلىسىنداعى مەديسينالىق قىزمەتتى باقىلاۋ جانە قوعامدىق دەنساۋلىق ساقتاۋ دەپارتامەنتتەرىندە باسشىلىق قىزمەتتەر؛
- 2018 ج. — استانا قالاسى بويىنشا ەڭبەك، الەۋمەتتىك قورعاۋ جانە كوشى-قون كوميتەتى دەپارتامەنتى باسشىسىنىڭ ورىنباسارى؛
- 2018–2022 جج. — نۇر-سۇلتان قالاسىنىڭ قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى؛
- 2023 جىلعى قىركۇيەكتەن بەرى — استانا قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى.
ءاليا رۇستەموۆا دارىگەرلىك قىزمەتتەن باستاپ، دەنساۋلىق ساقتاۋ سالاسىنداعى ءىرى قالالىق جانە وڭىرلىك قۇرىلىمداردى باسقارۋعا دەيىنگى جولدان وتكەن. ۆيسە-مينيستر لاۋازىمىنا تاعايىندالعانعا دەيىن ول استانا قالاسىنىڭ قوعامدىق دەنساۋلىق ساقتاۋ باسقارماسىن باسقاردى.