قارجى ءمينيسترى 950 ملرد تەڭگە جۇمسالعانىن جەتكىزدى.
پرەمەر-مينيستردىڭ ورىنباسارى – قارجى ءمينيسترى ەرۇلان جاماۋبايەۆ سەناتتىڭ جالپى وتىرىسىندا وتكەن جىلى مەملەكەت ءوزىنىڭ الەۋمەتتىك مىندەتتەمەلەرىن تولىق كولەمدە ورىنداعانىن حابارلادى، دەپ حابارلايدى Almaty-akshamy.kz Egemen.kz سىلتەمە جاساپ.
ەرۇلان جاماۋبايەۆ بىلتىرعى كىرىستەر بويىنشا جوسپار 156 ملرد تەڭگەگە اسىرا ورىندالعانىن ايتتى.
«بيۋدجەتكە 7،4 ترلن تەڭگە ءتۇستى. سالىق تۇسىمدەرى 7،1 ترلن تەڭگەنى نەمەسە 102،1%-دى قۇرادى. سالىق بويىنشا اسىرا ورىنداۋدىڭ نەگىزگى سوماسى كورپوراتيۆتىك تابىس سالىعىنا، شيكى مۇنايعا، ەكسپورت، كەدەن باجىنا جانە يمپورتقا قوسىلعان قۇن سالىعىنا تيەسىلى بولدى. سالىق تۇسىمدەرىن ۇلعايتۋدىڭ نەگىزگى فاكتورلارى ەكونوميكانىڭ بىرتىندەپ جاندانۋى مەن سالىق ءارى كەدەن سالاسىن اكىمشىلەندىرۋدى جەتىلدىرۋ بولدى. سوڭعى 3 جىلدا سالىق پەن كەدەن سالاسىن اكىمشىلەندىرۋ مەن سيفرلاندىرۋدان بيۋدجەتكە 2 ترلن تەڭگەدەن استام قوسىمشا تۇسىمدەر قامتاماسىز ەتىلگەنىن اتاپ وتكىم كەلەدى»، - دەدى مينيستر.
ونىڭ ايتۋىنشا، 2021 جىلدىڭ قورىتىندىسى بويىنشا جۇڭگو حالىق رەسپۋبليكاسىنىڭ ەكسپورتى – قازاقستان رەسپۋبليكاسىنىڭ يمپورتى باعىتى بويىنشا ستاتيستيكالىق دەرەكتەردەگى الشاقتىق 40،5%-عا دەيىن تومەندەدى.
پرەمەر-مينيستردىڭ ورىنباسارى بيۋدجەت شىعىستارى جايلى ءسوز قوزعادى.
«2021 جىلى بيۋدجەت شىعىستارى 56 ستراتەگيالىق باعىتتى قامتىدى جانە دامۋ جوسپارلارىنىڭ 263 ينديكاتورىنا قول جەتكىزىلدى. ۇلتتىق جوبالار مەن مەملەكەتتىك باعدارلامالاردى ىسكە اسىرۋ ەلدىڭ الەۋمەتتىك-ەكونوميكالىق دامۋىنا وڭ اسەر ەتتى. ماسەلەن، وتكەن جىلى 17 ملن شارشى مەتردەن استام تۇرعىن ءۇي پايدالانۋعا بەرىلدى. قالالار مەن اۋىلداردا 5،3 مىڭ شاقىرىمعا جۋىق سۋمەن جابدىقتاۋ جەلىلەرى سالىندى. جەرگىلىكتى ماڭىزى بار 1 287 شاقىرىم اۆتوجول جاڭعىرتىلدى. كولىكتىڭ بارلىق تۇرلەرىمەن جۇك تاسىمالداۋ كولەمى 3،7 ملرد توننانى قۇرادى. اگروونەركاسىپتىك كەشەندە 24 مىڭنان استام ينۆەستيسيالىق جوبا سۋبسيديالاۋمەن قامتىلدى»، - دەدى پرەمەر-مينيستردىڭ ورىنباسارى.
ول سونداي-اق مۇعالىمدەر مەن دارىگەرلەردىڭ جالاقىسى كوتەرىلگەنىنە نازار اۋداردى.
«ءبىلىم بەرۋ، دەنساۋلىق ساقتاۋ جانە مادەنيەت سالاسىندا پەداگوگتاردىڭ، دارىگەرلەردىڭ، مادەنيەت جانە حالىقتى الەۋمەتتىك قورعاۋ قىزمەتكەرلەرىنىڭ ەڭبەكاقىسى كوتەرىلدى. تەك وسى ماقساتتاردىڭ وزىنە شامامەن 950 ملرد تەڭگە جۇمسالدى. ەپيدەمياعا قارسى شارالاردى جۇرگىزۋگە 422 ملرد تەڭگەدەن استام قاراجات ءبولىندى. جالپى پاندەمياعا قاراماستان، مەملەكەت ءوزىنىڭ الەۋمەتتىك مىندەتتەمەلەرىن تولىق كولەمدە ورىندادى»، - دەدى ەرۇلان جاماۋبايەۆ.