ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن مەملەكەت باسشىسىنىڭ سايلاۋالدى باعدارلاماسىن ىسكە اسىرۋ جونىندەگى رەسپۋبليكالىق شتابتا 2029 جىلعا قاراي شاعىن جانە ورتا بيزنەستە (شوب) جۇمىسپەن قامتىلعاندار سانىن 4،7 ملن ادامعا دەيىن جەتكىزۋ شارالارى قارالدى، دەپ حابارلايدى اlmaty-akshamy.kz.
2022 جىلدىڭ قورىتىندىسى بويىنشا وتاندىق بيزنەس بارلىق نەگىزگى كورسەتكىش بويىنشا وڭ ءوسۋ سەرپىنىن كورسەتتى:
ەكونوميكاداعى شوب ۇلەسى 36%-عا (+2،5%)؛
جۇمىس ىستەپ تۇرعان نىساندار سانى 1،8 ملن-عا (+ 22%)؛
شوب-تا جۇمىسپەن قامتىلعاندار سانى 4،1 ملن ادامعا (+16%).
وبلىستار بويىنشا 2022 جىلدىڭ 4 توقسانىنىڭ قورىتىندىسىنا سايكەس شوب-تا جۇمىسپەن قامتىلعاندار سانى الماتى (26%)، استانا (15%) قالالارىندا، تۇركىستان وبلىسىندا جانە شىمكەنتتە (16%)، قىزىلوردا وبلىسىندا (14%) ەڭ جوعارى ءوسىم كورسەتكەن.
ال شوب-تا جۇمىسپەن قامتىلعاندار سانىنىڭ ءوسۋى بويىنشا ەڭ تومەنگى كورسەتكىش پاۆلودار (0،3%)، سولتۇستىك قازاقستان (1%) جانە قوستاناي (2،6%) وبلىستارىندا تىركەلدى.
بيزنەستى مەملەكەتتىك قارجىلاي قولداۋ قۇرالدارى اياسىندا وتكەن جىلى جالپى سوماسى 990 ملرد تەڭگەدەن اساتىن نەسيەگە 24،5 مىڭ جوبا سۋبسيديالاندى، ال تولەنگەن سۋبسيديالار سوماسى 181 ملرد تەڭگەدەن استى.
بۇدان باسقا شاعىن جانە ميكروكاسىپكەرلىك نىساندارىنا جاڭا بيزنەس-يدەيالاردى ىسكە اسىرۋعا 3 ملرد تەڭگەدەن استام سوماعا 834 گرانت بەرىلدى.
41 جوبانى ىسكە اسىرۋ ءۇشىن قاجەتتى ينفراقۇرىلىمدى جۇرگىزۋگە 18،3 ملرد تەڭگە ءبولىندى.
مەملەكەت باسشىسىنىڭ قالالار مەن اۋدانداردا تۇراتىن ءاربىر 10 مىڭ ادامعا 100 جۇمىس ورنىن قۇرۋ جونىندەگى تاپسىرمانىڭ ورىندالۋى تۋرالى
جىل باسىنان بەرى 86 مىڭنان استام ادام جۇمىسقا ورنالاستىرىلعان.
رەسپۋبليكا بويىنشا كورسەتكىشتىڭ ورىندالۋى 25%-دان اسادى.
ەڭ جوعارى كورسەتكىشتەر رەسپۋبليكالىق ماڭىزى بار قالالاردا، تۇركىستان جانە الماتى وبلىستارىندا تىركەلىپ وتىر. قالعان وڭىرلەردە جۇمىس جوسپار بويىنشا ءجۇرىپ جاتىر.
پرەمەر-مينيستر ۇكىمەتتىڭ الدىندا 2025 جىلعا قاراي ەكونوميكاداعى شاعىن جانە ورتا بيزنەستىڭ ۇلەسىن 40%-عا دەيىن جەتكىزۋ مىندەتى تۇرعانىن اتاپ ءوتتى.
«بۇل ەكونوميكا دامۋىن تۇراقتى ەتۋگە جانە حالىقتىڭ تابىسىن ارتتىرۋعا ەلەۋلى ۇلەس قوسادى. بۇگىنگى تاڭدا ءوسۋ قارقىنى رەسپۋبليكا بويىنشا 16% بولسا، كەيبىر ايماقتاردا كورسەتكىش – تەك 1-3% دەڭگەيىندە. بۇل ماسەلەگە باسا نازار اۋدارۋ كەرەك. جالپى كوپتەگەن دامىعان مەملەكەتتە ەكونوميكاعا نەگىزگى ۇلەس قوسۋشى شاعىن جانە ورتا بيزنەس بولىپ كەلەدى. ءبىز وسىعان ۇمتىلىپ، بۇل ورايدا ءتيىستى شارالاردى قابىلداۋىمىز كەرەك»، — دەدى ءاليحان سمايىلوۆ.
اتاپ ايتقاندا، ازاماتتاردىڭ ءوز ءىسىن اشۋ جانە دامىتۋ جونىندەگى باستامالارىن بەلسەندى تۇردە قولداۋ قاجەت. بۇل رەتتە بارلىق اۋدان مەن قالا اكىمدەرى جىل سايىن ءاربىر 10 مىڭ تۇرعىنعا 100 جاڭا جۇمىس ورنىن اشۋ تۋرالى نىسانالى ينديكاتورلارعا قول جەتكىزۋى كەرەك.
تاعى ءبىر ستراتەگيالىق مىندەت – ەكونوميكا قاجەتتىلىكتەرىن وتەۋ ءۇشىن كادرلار دايارلاۋ. وسىعان بايلانىستى جالپى ەكونوميكانىڭ، اتاپ ايتقاندا بيزنەستىڭ ناقتى قاجەتتىلىگىنە باعىتتالعان ءبىلىم بەرۋ جۇيەسىن جەتىلدىرۋ قاجەت.
