كوروناۆيرۋس پاندەمياسى اياقتالدى.
الەم بويىنشا كوروناۆيرۋس پاندەمياسى اياقتالدى. COVID-19 ۆيرۋسىمەن ءۇش جىلدان استام كۇرەس ءجۇردى. قازاقستان ىندەتپەن قالاي كۇرەستى؟ دەنساۋلىق ساقتاۋ مينيسترلىگى قورىتىندى شىعاردى، دەپ حابارلايدى اlmaty-akshamy.kz.
«قازاقستاندا پاندەميا جاريالانعان العاشقى كۇننەن باستاپ ۆەدومستۆوارالىق كوميسسيا قۇرىلىپ، وندا 2 مىڭنان استام جەدەل جانە ۇتىمدى شەشىمدەر قابىلداندى. كوميسسيا حالىقتىڭ دەنساۋلىعىن COVID-19-دان ساقتاۋ مەن قورعاۋ، مەملەكەتتىك ورگانداردىڭ ءوزارا ءىس-قيمىلى، مەديسينالىق ۇيىمداردىڭ ينفراقۇرىلىمىن نىعايتۋعا قاتىستى شەشىمدەر قابىلدادى. سونىمەن قاتار دارىلىك زاتتاردى، يممۋنوبيولوگيالىق پرەپاراتتاردى، مەديسينالىق قۇرال-جابدىقتى، جەكە قورعانۋ قۇرالدارىن ساتىپ الۋ، ەلدەگى جانە الەمدەگى ەپيدەميولوگيالىق جاعدايدى ەسكەرە وتىرىپ، كارانتين تالاپتارىن كۇشەيتۋ جانە السىرەتۋ بويىنشا شەشىمدەر قابىلدادى»، - دەلىنگەن مينيسترلىك حابارلاماسىندا.
ودان بولەك، پاندەميا باستالعاندا مينيسترلىك جانە بارلىق ءوڭىر اكىمدىكتەرى جانىنان رەسپۋبليكالىق جانە جەدەل شتابتار قۇرىلدى. ولار كۇن سايىن كوروناۆيرۋس ينفەكسياسىنا قارسى ءىس-قيمىل جونىندەگى مەديسينالىق ۇيىمداردىڭ جۇمىسىن ۇيلەستىردى.
«پاندەميا كەزەڭىندە ەلىمىزدىڭ باس مەملەكەتتىك سانيتار دارىگەرى COVID-19-بەن كۇرەستە پروفيلاكتيكالىق جانە ەپيدەمياعا قارسى شارالار بويىنشا 83 قاۋلى قابىلدادى. جاڭا قاۋلى كوروناۆيرۋس ينفەكسياسىنىڭ جاڭا نۇسقالارىنىڭ پايدا بولۋىن جانە ۆيرۋستىڭ قاسيەتى تۋرالى تاجىريبەنى ەسكەرە وتىرىپ، وزەكتەندىرىلىپ وتىردى. ۋاقتىلى مەديسينالىق كومەك كورسەتۋ ءۇشىن قالالاردا 16 مودۋلدىك اۋرۋحانا سالىندى جانە 3 ينفەكسيالىق اۋرۋحانا قايتا جاڭارتىلدى، سونداي-اق 63 امبۋلاتوريالىق-ەمحانالىق ۇيىم پايدالانۋعا بەرىلدى»، - دەيدى ۆەدومستۆودان.
اقپاراتتا ايتىلعانداي، كوروناۆيرۋس ىندەتى كۇشەيگەن كەزدە ۇيگە بارىپ مەديسينالىق كومەك كورسەتەتىن 3054 كوشپەلى ءموبيلدى بريگادا جۇمىسىن باستادى.
«پسيحوەموسيونالدىق جۇكتەمەنى، قاۋىپتەردى ەسكەرە وتىرىپ، مەديسينا كادرلارىن الەۋمەتتىك قولداۋدى قامتاماسىز ەتۋ ماقساتىندا مەديسينا قىزمەتكەرلەرىنە ۇستەمەاقى تولەۋ بويىنشا شارالار قابىلداندى. پاندەميا كەزىندە 57 مىڭ مەديسينا قىزمەتكەرى شامامەن 285 ملرد تەڭگە كولەمىندە تولەمدەر الدى. وتاندىق دەنساۋلىق ساقتاۋ جۇيەسى رەسۋرستارىنىڭ، مەديسينا قىزمەتكەرلەرىنىڭ قاجىرلى ەڭبەگىنىڭ جانە كۆي بويىنشا پروفيلاكتيكالىق جانە ەپيدەمياعا قارسى ءىس-شارالاردى ۋاقتىلى جۇرگىزۋدىڭ ارقاسىندا ولىمگە اكەلەتىن ينفەكسيانىڭ تارالۋىن توقتاتۋعا قول جەتكىزىلدى»، - دەپ تولىقتىرادى ۆەدومستۆو.
سونداي-اق دەنساۋلىق ساقتاۋ مينيسترلىگى كوروناۆيرۋستى جۇقتىرۋ، ودان بولعان ءولىم-جىتىم جونىندە ستاتيستيكانى ۇسىندى.
ەلىمىزدە 2020 جىلعى 13 ناۋرىز بەن 2023 جىلعى 5 مامىر ارالىعىندا كوروناۆيرۋس ينفەكسياسىنىڭ 1 411 883 جاعدايى تىركەلدى. پاندەميا 13 848 قازاقستاندىقتىڭ ءومىرىن قيدى. ودان باسقا، 2020 جىلعى 1 تامىز بەن 2023 جىلعى 5 مامىر ارالىعىندا كوروناۆيرۋس بەلگىلەرى بار پنيەۆمونيانىڭ 91 027 جاعدايى تىركەلدى، سالدارىنان 5413 ادام قايتىس بولدى.