ۇكىمەتتىڭ سيفرلىق كەڭسەسىندە ق ر پرەمەر-مينيسترى ءاليحان سمايىلوۆ الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تەجەۋ (ءامات) ماسەلەلەرى بويىنشا كەڭەس وتكىزدى.
ساۋدا جانە ينتەگراسيا ءبىرىنشى ۆيسە-مينيسترى ارمان شاكقالييەۆ جىل باسىنان بەرى ءامات 22،3%-عا، اپتانىڭ قورىتىندىسى بويىنشا 0،2%-عا وسكەنىن ءمالىم ەتتى، دەپ حابارلايدى Almaty-akshamy.kz رrimeminister.kz-كە سىلتەمە جاساپ.
اتاپ ايتقاندا، پياز باعاسى 1،7%-عا، قىرىققابات 0،9%-عا، كۇرىش 0،8%-عا، سۇزبە 0،7%-عا، جۇمىرتقا مەن ءسۇت 0،5%-عا قىمباتتادى. جىل باسىنان بەرى ءامات باعاسىنىڭ ەڭ كوپ ءوسۋى ۇلىتاۋ وبلىسىندا (31،4%) جانە استانا قالاسىندا (25%) بايقالدى.
ونىڭ ايتۋىنشا، قازىرگى ۋاقىتتا باعا قالىپتاسۋىنىڭ بۇكىل تىزبەگى بويىنشا دەلدالدىق سحەمالارعا قارسى كۇرەس جونىندەگى وڭىرلىك كوميسسيالاردىڭ جۇمىسى جۇيەلەنىپ، ولاردىڭ قۇرامى كۇشەيتىلدى. ول «4-5 بۋىندىق» دەلدالداردىڭ قىزمەتىنە بايلانىستى بولشەك ساۋدا ونىمدەرىنىڭ باعاسى ءىس جۇزىندە 60%-عا وسەتىنىن اتاپ ءوتتى. وسى ورايدا وڭىرلىك كوميسسيالاردىڭ جۇمىسى كوتەرمە جەتكىزىلىم، لوگيستيكا جانە قويما تىزبەكتەرىنىڭ سحەمالارىن تالداۋعا، سونداي-اق دەن قويۋ شارالارىن قابىلداۋعا باعىتتالعان.
بۇدان باسقا، رۇقسات ەتىلگەن ساۋدا ۇستەمەسىن (15%) باقىلاۋ بولىگىندە «ۇيلەردىڭ جانىنداعى» دۇكەندەرمەن جۇمىس كۇشەيتىلدى جانە نارىقتىڭ اشىقتىعىن قامتاماسىز ەتۋ ءۇشىن رەسپۋبليكا اۋماعىندا تاۋارلاردى قاداعالاۋ جۇيەسى جەتىلدىرىلۋدە.
اۋىل شارۋاشىلىعى ءمينيسترى ەربول قاراشوكەيەۆ ەلدىڭ ىشكى نارىعىن وتاندىق ونىممەن قامتاماسىز ەتۋ، كوكونىس ءوندىرىسىن فورۆاردتىق قارجىلاندىرۋ، مەملەكەتتىك قولداۋ الاتىن تاۋار وندىرۋشىلەر تاراپىنان قارسى مىندەتتەمەلەردىڭ ورىندالۋىن باقىلاۋ بويىنشا جۇرگىزىلىپ جاتقان جۇمىستار تۋرالى باياندادى.
ق ر باسەكەلەستىكتى قورعاۋ جانە دامىتۋ اگەنتتىگى ءتوراعاسىنىڭ ءبىرىنشى ورىنباسارى رۋستام احمەتوۆ ازىق-تۇلىك باعاسىنىڭ نەگىزسىز ءوسۋى فاكتىلەرى بويىنشا قابىلدانعان مونوپولياعا قارسى دەن قويۋ شارالارى تۋرالى ايتىپ بەردى. اتاپ ايتقاندا، ۇستەم جاعدايدى تەرىس پايدالانعانى جانە باسەكەلەستىككە قارسى كەلىسىلگەن ءىس-قيمىلدارى ءۇشىن ءبىرقاتار قۇس فابريكالارىنا قاتىستى بەس تەرگەۋ تاعايىندالدى، ءامات نارىعىندا قانت، تاۋىق ەتى مەن ءسۇت ونىمدەرىن كوتەرمە جەتكىزۋشىلەرگە 90 حابارلاما بەرىلدى، جۇمىرتقا، قانت، ءسۇت ونىمدەرىن وندىرۋشىلەرگە جانە ساۋدا ورىندارىنا قاتىستى 19 تەرگەۋ تاعايىندالدى.
«وڭىرلەرگە باعاسىنىڭ اۋىتقۋى اسا ىقتيمال كوكونىس جانە باسقا دا تاۋار تۇرلەرى بويىنشا كەلىسىمشارتتار جاساسۋ جونىندە ءتيىستى تاپسىرما جولداندى. سونىمەن قاتار كەيبىر وڭىرلەردىڭ جوسپارلانعان شارالاردى ورىنداماۋىنا جانە فورمالدى تۇردە قاراۋىنا بايلانىستى باعانىڭ ءوسۋى بايقالادى»، - دەدى ءاليحان سمايىلوۆ.
پرەمەر-مينيستر ماۋسىمارالىق باعانى ۇستاپ تۇرۋ ءۇشىن كوكونىس بويىنشا جەدەل تۇردە كەلىسىمشارتتار، سونداي-اق قالعان وڭىرلەرگە – قانت زاۋىتتارىمەن شارتتار جاساسۋدى قامتاماسىز ەتۋ قاجەتتىگىن اتاپ ءوتتى.
«ىشكى نارىقتى ءوز ازىق-تۇلىكتەرىمىزبەن تولىقتىرۋ جانە ولاردى ماۋسىمارالىق كەزەڭدە ساقتاۋ ءۇشىن جاعداي جاساۋ بويىنشا جۇيەلى جۇمىستار جۇرگىزۋدىڭ ماڭىزى زور. وڭىرلىك كوميسسيالار تاراپىنان دەلدالدىق سحەمالاردى تەرگەۋ جونىندەگى ۋاقتىلى شارالار قاجەت. ءبىزدىڭ باستى مىندەتىمىز – ازاماتتاردى قولجەتىمدى باعادا قاجەتتى تاۋارلارمەن قامتاماسىز ەتۋ»، - دەدى ول.
كەڭەستى قورىتىندىلاي كەلە، پرەمەر-مينيستر جاڭا جىل قارساڭىندا جاعدايدى تۇراقتاندىرۋ ءۇشىن باعانى ۇستاپ تۇرۋدىڭ جاڭا تاسىلدەرىن تولىققاندى ىسكە اسىرۋدى، سونداي-اق ءبىر اي مەرزىمىندە قوسىمشا زاماناۋي كوكونىس قويمالارىن سالۋ ماسەلەلەرىن پىسىقتاۋدى تاپسىردى.
«ينفلياسيانىڭ جوعارى قارقىنى ەكونوميكانىڭ ۇدەمەلى دامۋىنا مۇمكىندىك بەرمەيدى جانە ازاماتتاردىڭ الەۋمەتتىك ءال-اۋقاتىنا اسەر ەتەدى. وسىعان بايلانىستى كەلەسى جىلى ونى 2 ەسەگە تومەندەتۋ بويىنشا جۇمىس – ۇلتتىق قاۋىپسىزدىك ماسەلەسى بولىپ وتىر. بۇل جۇمىستا فورمالدىلىق بولماۋى ءتيىس»، - دەدى ءاليحان سمايىلوۆ.
سونداي-اق، كەڭەستە الماتى وبلىسىندا «G4 City» جوباسىن ودان ءارى ىسكە اسىرۋ ماسەلەلەرى قارالدى. پرەمەر-مينيستر «G4 City» اۋماعىندا ارنايى ەكونوميكالىق ايماق قۇرۋدى جەدەلدەتۋدى، قالانىڭ باس جوسپارىن بەكىتۋ جانە قالا قۇرىلىسى قۇجاتتارىن ازىرلەۋ جونىندە قاجەتتى شارالار قابىلداۋدى، سونداي-اق جوبانى تۇتاستاي ىسكە اسىرۋ جونىندەگى جول كارتاسىن وزەكتەندىرۋدى تالاپ ەتتى.