ۇكىمەت باسشىسى الماتىداعى مەكتەپ اۆتوبۋستارىنىڭ قاۋىپسىزدىگىن تەكسەردى

ق ر پرەمەر-مينيسترى الماتىداعى Hyundai Trans Almaty زاۋىتىندا بولدى.

ءاليحان سمايىلوۆ مەكتەپ كولىگىنىڭ سەنىمدىلىگى مەن قاۋىپسىزدىگىن ءوزى تەكسەردى، دەپ حابارلايدى Almaty-akshamy.kz

الماتى اكىمىنىڭ ورىنباسارى اسەم ءنۇسىپوۆا ۇكىمەت باسشىسىنا بيىل 7700 بالاعا ارنالعان "مەكتەپ اۆتوبۋسى" پيلوت جوباسى ىسكە قوسىلعانىن ايتتى.

اۆتوبۋس باعىتتارى مۇمكىندىگىنشە كوپ وقۋشىنى مەكتەپكە دەيىن تاسىمالداۋ ءۇشىن جاسالعان.

"بالالاردى ءتۇسىرۋ جانە كەلۋ-كەتۋ ۋاقىتىن كورسەتەتىن ارنايى ايالدامالار بار. ايالدامالاردا بەينەباقىلاۋ كامەرالارى ورناتىلعان. ءار باعىتتا تۇراتىن مۇعالىمدەر جولسەرىك رەتىندە بالالاردى دەمەپ جىبەرەدى"، - دەدى اسەم ءنۇسىپوۆا.

- قالالىق ۇتقىرلىق باسقارماسى 30 مەكتەپ اۆتوبۋسىن ناۋرىز ايىندا، ال قالعان 70 اۆتوبۋستى مامىر ايىندا جەتكىزۋدى جوسپارلاپ وتىر، - دەدى ول. بۇل ماقساتتارعا بارلىعى 5،2 ملرد تەڭگە ءبولىندى.

Hyundai Trans Almaty ديرەكتورى ادىلبەك گايەۆ اۆتوبۋستار كۇشەيتىلگەن قاۋىپسىزدىك جۇيەسى بار تەحنيكالىق رەگلامەنتتەردىڭ بارلىق ستاندارتىنا سايكەس كەلەتىنىن، سونىڭ ارقاسىندا كولىك 60 كم/ساع جىلدامدىقپەن جۇرمەيتىنىن ايتتى.

ايتا كەتۋ كەرەك، زاۋىت 2011 جىلدان بەرى اۆتوبۋس، رەانيموبيل، بورتتىق جۇك كولىگى، يزوتەرميالىق جانە دايىن تاۋار فۋرگونى، رەفريجەراتور، ءورت ءسوندىرۋ ماشيناسى، قوقىس تاسيتىن، سۋ تاسيتىن كولىكتەر، ەۆاكۋاتورلار جانە باسقا دا جولاۋشى، جۇك، شاعىن، ورتا كولىكتەرگە ارنالعان ارنايى تەحنيكالار شىعارادى.

زاۋىت 2022 جىلدىڭ جەلتوقسان ايىنان باستاپ مەكتەپ اۆتوبۋستارىن قۇراستىرا باستادى. بۇگىندە سەگىزگە جۋىق Golden Dragon اۆتوبۋسى شىعارىلدى.