ۇيقىسىزدىق دەرتى

14 قىركۇيەك — دۇنيەجۇزىلىك اتوپيالىق دەرماتيت كۇنى

اتوپيالىق دەرماتيت – الەمدەگى ميلليونداعان ادامعا، اسىرەسە بالالارعا اسەر ەتەتىن سوزىلمالى قابىنۋ تەرى اۋرۋى. اللەرگيالىق سيپاتتاعى بۇل سىرقات ادەتتە بالالىق شاقتا، كوبىنەسە العاشقى ايلاردا باستالىپ، ءومىر بويى جالعاسۋى مۇمكىن.

جىل سايىن 14 قىركۇيەكتە اتوپيالىق دەرماتيت تۋرالى حاباردار ەتۋ جانە ناۋقاستارعا قولداۋ كورسەتۋ ماقساتىندا دۇنيەجۇزىلىك اتوپيالىق دەرماتيتپەن كۇرەس كۇنى اتاپ وتىلەدى. اۋرۋدىڭ نەگىزگى بەلگىلەرى – تەرىنىڭ قاتتى قىشۋى، قىزارۋى، قابىرشاقتانۋى جانە ۇيقىنىڭ بۇزىلۋىنا اكەلەتىن قابىنۋلار. بۇل سيمپتومدار ناۋقاستاردىڭ ءومىر ساپاسىنا ايتارلىقتاي اسەر ەتىپ، ءتىپتى ۇيقىسىزدىق پەن دەپرەسسياعا اكەلۋى مۇمكىن.

اتوپيالىق دەرماتيتتىڭ ناقتى سەبەپتەرى ءالى تولىق انىقتالماعان، ءبىراق گەنەتيكالىق، ەكولوگيالىق جانە يممۋنولوگيالىق فاكتورلار ماڭىزدى ءرول اتقارادى دەپ سانالادى.

كارديولوگيا جانە ىشكى اۋرۋلار عىلىمي-زەرتتەۋ ينستيتۋتى رەسپۋبليكالىق اللەرگولوگيا ورتالىعىنىڭ مەڭگەرۋشىسى اراي باتىربايەۆانىڭ ايتۋىنشا، قازىرگى تاڭدا اتوپيالىق دەرماتيتتى ەمدەۋدىڭ بىرنەشە تاسىلدەرى بار. ولاردىڭ قاتارىندا جەرگىلىكتى كورتيكوستەرويدتار، كرەمدەر، انتيگيستاميندەر جانە كەيبىر جاعدايلاردا جۇيەلىك پرەپاراتتار قولدانىلادى. اۋرۋدى ەرتە دياگنوستيكالاۋ مەن دۇرىس ەمدەۋ سيمپتومداردى جەڭىلدەتىپ، ناۋقاستىڭ جاعدايىن ايتارلىقتاي جاقسارتادى.

اراي باتىربايەۆا: «دۇنيەجۇزىلىك اتوپيالىق دەرماتيت كۇنى – بۇل سىرقات تۋرالى حاباردار بولۋ مۇمكىندىگى عانا ەمەس، سونىمەن قاتار وسى اۋرۋدان زارداپ شەگەتىندەر ءۇشىن قولداۋ كورسەتۋگە باعىتتالعان ماڭىزدى كۇن»، – دەپ اتاپ ءوتتى.