تۇركيا پرەزيدەنتى رەجەپ تايىپ ەردوعان ءزىلزالا بولعان گازيانتەپ پروۆينسياسى نۋرداعى قالاسىنىڭ تۇرعىندارىمەن كەزدەستى.
ول اپات بولعان ايماقتاردى قالپىنا كەلتىرۋ جۇمىستارى ناۋرىز ايىندا باستالاتىنىن ءمالىم ەتتى، دەپ حابارلايدى Almaty-akshamy.kz
تۇركيا پرەزيدەنتى رەجەپ تايىپ ەردوعان سەيسەنبى كۇنى گازيانتەپ پروۆينسياسىنىڭ نۋرداعى قالاسىنا بارىپ، ءزىلزالا بولعان ايماقتا جاڭا تۇرعىن ۇيلەر بوي كوتەرەتىنىن ايتتى.
«ءبىر جىل ىشىندە 11 پروۆينسيانىڭ قالالارىندا 200 مىڭعا دەيىن تۇرعىن ءۇي سالۋ جوسپارلانىپ وتىر. اپات ايماعىنداعى اۋىلداردا تاعى 70 مىڭ ءۇي سالىنادى»، - دەدى ەردوعان قالا تۇرعىندارىمەن كەزدەسۋ بارىسىندا.
تۇركيا پرەزيدەنتى اپات ايماعىنداعى جاعداي تولىق تەكسەرىلگەن سوڭ، سالىناتىن تۇرعىن ۇيلەردىڭ ناقتى سانى انىقتالاتىنىن اتاپ ءوتتى.
ايتا كەتسەك، سوڭعى اپتالاردا گازيانتەپ پروۆينسياسىنان 87 مىڭ تۇرعىن ەلدىڭ باسقا ايماقتارىنا ەۆاكۋاسيالانعان.