ۇيلەرى قاشان بارساڭ دا تاپ-تۇيناقتاي بولىپ تۇراتىن ادامدار بار.
دەگەنمەن بۇل جەردە اڭگىمە ۇنەمى قولىنان شاڭسورعىش پەن شۇبەرەك تۇسپەيتىندەر تۋرالى ەمەس. تازالىق ساقتاۋدا اسا كوپ كۇش كەتىرمەيتىن جاندار دا بار.
ولار ءيدى ۇنەمى دەرلىك تازا دا جيناقى ۇستاۋعا كومەكتەسەتىن بىرنەشە ادەتتى ۇستانادى. Almaty-akshamy.kz cايتى Elorda.info سايتىنا جۇگىنە وتىرىپ، ءۇيدىڭ شاشىلماۋى ءۇشىن قاجەتتى ءتورت ادەتتى ۇسىنادى.
زاتتى كوپ جيناماۋ
كەڭىستىكتى ىڭعايلى ەتۋدىڭ ەڭ ءتيىمدى جولى - ارتىق زاتتان ارىلۋ. ىبىرسىعان دۇنيە جوق بولسا، ونى رەتتەپ جيناۋدىڭ دا قاجەتى جوق قوي. سوندىقتان ءسىز ءبىرىنشى سومكەڭىزدە جينالىپ قالعان چەكتەردى، قاعاز قيىندىلارىن جانە تولەم پاراقتارىن لاقتىرىپ تاستاڭىز. «كەيىن سوعان قاراپ وتباسى بيۋدجەتىن جوسپارلايمىن» دەپ ءوز-وزىڭىزدى الدارقاتپاي-اق قويىڭىز. ونى جاسامايتىنىڭىز ايدان انىق.
ءارى قاراي «ءبىر كۇنى تۇيمەسىن قادايمىن، جىرتىعىن جامايمىن» دەپ الىپ قويعان كيىمدەرىڭىزدى لاقتىرىپ تاستاساڭىز دا بولادى. ويتكەنى ءسىز مۇنى بىردەن جاساماعان بولساڭىز، كەيىن دە قولىڭىز بوساماسى انىق.
تازا بولۋ مەن مۇقيات بولۋدىڭ ايىرماشىلىعى
ءۇيدىڭ شاڭى قانشا سۇرتىلسە دە، ويىنشىقتار مەن كيىمدەر شاشىلىپ جاتسا، تازالىق كورىنبەيدى. اسۇيدە ىدىس-اياعىڭىز جۋىلىپ تۇرعانىمەن، ۇستەلدىڭ ۇستىندە رەتسىز تۇرسا دا سولاي، ءۇيىڭىزدىڭ جينالعانى بىلىنبەي قالادى. ال كەرىسىنشە بۇرىشتاردا ءسال-پال شاڭ بولعانىمەن، زاتتار ءوز ورنىندا تۇرسا، ءسىز «اينالام قوپىراپ تۇر-اۋ» دەگەن مازاسىزدىقتان ارىلاسىز.
ءۇيدى جيناۋ ءۇشىن قولايلى ءساتتى كۇتپەۋ
سىزگە ءۇيىڭىز وتىز ادام قوناق بولىپ كەتكەندەگىدەي كۇيدە بولعانشا كۇتۋدىڭ قاجەتى جوق. بار كۇش-جىگەرىڭىزدى سارپ ەتۋدىڭ دە اسا كەرەگى شامالى. تەك قانا كۇندەلىكتى بىرنەشە ادەتتى قايتالاپ جۇرسەڭىز جەتكىلىكتى.
مىسالى، ۇيقىدان تۇرعان سوڭ توسەگىڭىزدى جيناپ تاستاڭىز، جۋىلعان كيىمدەرىڭىزدى كەپكەن بويدا كومودقا سالىپ قويىڭىز، ۇيگە كەلگەن سوڭ كيىمىڭىزدى شكافقا ءىلىپ جىبەرىڭىز، جۋىنىپ بولعان سوڭ اينانى ءسۇرتىپ الىڭىز، سوندا ۇيىڭىزدەگى تازالىق پەن ۇقىپتىلىق ۇزاققا دەيىن ساقتالادى. ءارى ءۇي جيناۋعا تولىق دەمالىس كۇنىڭىزدى ارنامايتىن بولاسىز.
ۇساق-تۇيەككە ءبىر جاشىك ارناۋ
بۇل كەڭەس الدىڭعى ايتقاندارىمىزعا پارادوكس سياقتى كورىنگەن شىعار؟ دەگەنمەن ءسىز بارلىق نارسەنى ءبىر مەزگىلدە رەتتەي المايسىز عوي. سوندىقتان شاشىلىپ جاتقان نەمەسە قاجەت ەمەس زاتتارعا ارنالعان ءبىر جاشىك شىعارىپ قويىڭىز. ءار اپتا سايىن ونداعى زاتتاردى ىرىكتەپ، كەرەگىن قالدىرىپ، كەرەك ەمەسىن لاقتىراتىن بولاسىز.