قازاقستاندا «بايلانىس قىزمەتتەرىن كورسەتۋ قاعيدالارىن بەكىتۋ تۋرالى» بۇيرىققا وزگەرىستەر ەنگىزۋگە دايىندىق جۇرگىزىلىپ جاتىر.
اشىق قۇقىقتىق اكتىلەر سايتىندا ءتيىستى قۇجات جوباسى پايدا بولدى، - دەپ حابارلايدى Almaty-akshamy.kz Tengrinews.kz-كە سىلتەمە جاساپ.
قاشىقتان ۇيالى بايلانىس قىزمەتىن كورسەتۋگە كەلىسىم-شارت جاساسۋ ءۇشىن ولار قازاقستاندىقتاردى وزدەرىنىڭ بيومەتريالىق دەرەكتەرىن، بەت بەينەسىن ۇسىنۋدى مىندەتتەدى. بۇل جوبا ابونەنتتىك ءنومىردى بوتەن ەسىمگە تىركەيتىن قىلمىسكەرلەردىڭ جولىن كەسۋ ماقساتىندا ەنگىزىلمەك.
ءتيىستى بۇيرىق جوباسى 3 تامىزعا دەيىن قوعامدىق تالقىلاۋدا بولادى.
قازاقستان رەسپۋبليكاسىنىڭ سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين قازاقستاندىقتاردىڭ ۇيالى تەلەفون نومىرلەرىن بيومەتريالىق دەرەكتەرمەن بايلانىستىرۋعا بولاتىنىن ءبىر جىل بۇرىن مالىمدەگەن ەدى.
«ءبىز ۇيالى تەلەفوندى تىركەۋ كەزىندە بيومەتريالىق سايكەستەندىرۋدى جۇرگىزەمىز. ءبىر ادامعا نومىرلەردىڭ سوماسى رەسىمدەلەدى، ولار شەتەلگە شىعارىلعاندا الاياقتار سول ارقىلى الاياقتىق ارەكەتتەردى جاساي باستايدى. بۇعان جول بەرمەۋ ءۇشىن ءبىز ءقازىر نورماتيۆتىك قۇجاتتارعا قاجەتتى وزگەرىستەر ەنگىزىپ جاتىرمىز. تەحنيكالىق تۇرعىدان دايىنبىز. كورىپ وتىرعانىڭىزداي، بيومەتريالىق سايكەستەندىرۋ بارلىق جەردە قولدانىلادى»، - دەدى مينيستر باعدات مۋسين.
ەسكە سالا كەتەيىك، 2019 جىلدىڭ 1 قاڭتارىنان باستاپ ەلىمىزدە IMEI كودى + SIM كارتاسى + جەكە جسن سحەماسى بويىنشا قۇرىلعىلاردى مىندەتتى تىركەۋ ەرەجەلەرى كۇشىنە ەندى. قازاقستاندىقتاردىڭ ءاربىر قۇرىلعىسى وعان ورناتىلعان SIM كارتاسىنا اۆتوماتتى تۇردە قوسىلادى.