ءۇي ارالاپ ۆاكسينالايدى

بۇگىن الاتاۋ اۋدانىندا مەديسينا قىزمەتكەرلەرى ءۇي-ۇيدى ارالاپ، ۆاكسينالاۋ جۇمىستارىن جۇرگىزەدى.

شارانىڭ باستى ماقساتى – تۇرعىنداردىڭ سۇراقتارىنا جاۋاپ بەرە وتىرىپ، ەكپە الۋ تۋرالى دۇرىس اقپارات جەتكىزۋ. سونداي-اق، اۋداندا ۇيلەردى ارالاپ ەكپە سالۋمەن قاتار، ۇلكەن زاۋىت-فابريكا جۇمىسشىلارىنا اقپارات بەرۋ جيىندارى وتكىزىلىپ، جۇمىستان بوساي المايتىن قىزمەتكەرلەردى ۆاكسينالاۋ جۇمىستارى قولعا الىنعان.

قالالىق №25 ەمحانانىڭ باس دارىگەرى ءاليا مۇرات قىزى مۇنداي شارالار ءالى جالعاسىن تاباتىنىن ايتادى. شارانىڭ ەرەكشەلىگى – تۇرعىنداردىڭ اراسىنداعى جالعان اقپاراتتارعا توسقاۋىل قويۋ ەكەن.

«الاتاۋ اۋدانىندا 7 ەمحانا بار. وندا اۋدان بويىنشا 236 636 ادام تىركەلگەن. ەمحانالاردا اقپان ايىنان باستاپ ەمحانالارعا ۆاكسينالاۋ جۇمىستارى جۇرگىزىلۋدە. الدىمەن مەديسينا، كەيىن قۇقىق قورعاۋ قىزمەتكەرلەرى جانە مۇعالىمدەر ۆاكسينالاندى. ءساۋىر ايىنان باستاپ تۇرعىندارعا ەكپە ەگۋ جۇمىستارى قولعا الىندى. سول ۋاقىتتان بەرى الاتاۋ اۋدانىندا 24 ەكپە پۋنكتى اشىلدى. سونىڭ ىشىندە « اقبۇلاق»، «كەنجەحان»، «وجەت»، «جىبەك جولى» بازارلارى مەن «باقوردا»، «ستروي city» ساۋدا ورتالىقتارىندا، اۋدانعا قاراستى 4 مەكتەپتە بار.

جوسپار بويىنشا ۆاكسينا قابىلداۋعا جارامدى تۇرعىندار سانى 88 861 ادامدى قۇرادى. قازىرگى ۋاقىتتا 33 547 ادام ەكپە الدى. بۇل ۆاكسينا الۋعا جارامدى تۇرعىنداردىڭ 38 پايىزىن قۇرايدى. جوسپارعا سايكەس، شىلدە-تامىز ايلارى ارالىعىندا تۇرعىنداردى تولىق ۆاكسينالاۋ جۇمىستارى جۇرگىزىلەدى»، – دەيدى باس دارىگەر.