تاپسىرمالار سانى مەن جوعارى بالل وزگەرىسسىز قالدى.
عىلىم جانە جوعارى ءبىلىم ءمينيسترى ساياسات نۇربەك 2024 جىلعى ۇبت فورماتىنا ەنگىزىلەتىن وزگەرىستەر جايىندا ايتتى، دەپ حابارلايدى Almaty-akshamy.kz
ءمينيستردىڭ ايتۋىنشا، 2024 جىلعى ۇبت-دا تەست سۇراقتارىنىڭ سانى وزگەرەدى، سونداي-اق بەيىندىك پاندەرگە جاڭاشا تاپسىرمالار قوسىلىپ، تەستىلەۋ ۋاقىتى قىسقارادى.
"ۇبت-داعى پاندەردىڭ سانى وزگەرىسسىز قالادى، ياعني ۇشەۋى مىندەتتى جانە ەكەۋى تاڭداۋ پاندەرى. الايدا "وقۋ ساۋاتتىلىعى" مەن "ماتەماتيكالىق ساۋاتتىلىق" مىندەتتى پاندەرىنەن تاپسىرمالار سانى 5 سۇراققا قىسقارادى. ال بەيىندىك پاندەردىڭ سۇراقتار سانى ارتىپ، 40 تەست تاپسىرماسىنان تۇرادى. بەيىندىك پاندەردە بەرىلگەن تىزىمنەن سايكەستىكتى انىقتاۋعا ارنالعان 5 تاپسىرما قوسىلادى. بۇل وزگەرىستەر – تەست تاپسىرمالارىنىڭ ساپاسىن ارتتىرۋ مەن ولاردىڭ فۋنكسيونالدىق ساۋاتتىلىق پەن سىني ويلاۋ داعدىلارىن باعالاۋدىڭ الەمدىك ستاندارتتارىنا سايكەستىگى باعىتىنداعى جۇمىستاردىڭ قيسىندى جالعاسى"، دەپ جازدى عىلىم جانە جوعارى ءبىلىم ءمينيسترى.
ۇبت تاپسىرمالار سانى مەن جوعارى بالل وزگەرىسسىز قالدى. جالپى 120 سۇراق، 140 بالل:
قازاقستان تاريحى – 20 تاپسىرما؛
وقۋ ساۋاتتىلىعى – 10 تاپسىرما؛
ماتەماتيكالىق ساۋاتتىلىق – 10 تاپسىرما؛
ەكى بەيىندىك ءپان بويىنشا – 40 تاپسىرما.
جوعارىدا اتالعان وزگەرىستەرگە بايلانىستى تەستىلەۋ ۋاقىتى قىسقارادى. ەندى ۇبت تاپسىرۋعا وقۋشىلارعا 3 ساعات 30 مينۋت (210 مينۋت) بولىنەدى. بۇرىن 4 ساعات (240 مينۋت) بەرىلگەن. بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك.
"شىعارماشىلىق باعىتتاردى تاڭداعان تالاپكەرلەر "قازاقستان تاريحى" مەن "وقۋ ساۋاتتىلىعى" پاندەرىمەن قاتار "ماتەماتيكالىق ساۋاتتىلىقتى" مىندەتتى ءپان رەتىندە تاپسىرادى. "ماتەماتيكالىق ساۋاتتىلىقتان" تەست تاپسىرمالارى ومىردە ماتەماتيكالىق لوگيكا بويىنشا العان بىلىمدەرىن، داعدىلارىن قولدانا الۋىن تەكسەرۋگە باعىتتالعان. سوندىقتان بۇل ءپان بارلىق تالاپكەرگە مىندەتتى"، – دەدى ساياسات نۇربەك.
ءمينيستردىڭ ايتۋىنشا، بەيىندىك پاندەردىڭ كومبيناسياسى بويىنشا دا وزگەرىستەر بار. وقۋشىلاردىڭ، اتا-انالاردىڭ جانە پەداگوگيكالىق قاۋىمنىڭ پىكىرلەرى مەن ۇسىنىستارىن ەسكەرە وتىرىپ، "B059 – كوممۋنيكاسيالار جانە كوممۋنيكاسيالىق تەحنولوگيالار"، "B055 – ماتەماتيكا جانە ستاتيستيكا"، "B063 – ەلەكتروتەحنيكا جانە اۆتوماتتاندىرۋ" ءبىلىم بەرۋ باعدارلامالارىنىڭ توپتارىنا تۇسۋشىلەر "ماتەماتيكا-ينفورماتيكا" كومبيناسياسىن تاپسىرادى.
2024 جىلى تالاپكەرلەر بيىلعىداي ۇبت-نى بەس رەت تاپسىرا الادى. ونىڭ ەكەۋى گرانت تاعايىنداۋ كونكۋرسىنا قاتىسۋعا مۇمكىندىك بەرسە، قالعان ۇشەۋى اقىلى وقۋعا تۇسۋگە مۇمكىندىك بەرەدى.