اسا ءىرى كولەمدە ءبىرقاتار الاياقتىق جاسادى دەگەن كۇدىكپەن تۇركىستان وبلىسىنىڭ 55 جاستاعى تۋماسى ۇستالدى.
5 جابىرلەنۋشىگە كەلتىرىلگەن جالپى ماتەريالدىق شىعىن 65 ملن تەڭگەنى قۇرادى. پوليسەيلەردىڭ مالىمەتىنشە، 55 جاستاعى و.ەسىمدى ازامات ۇستالىپ، ق ر قىجك-نىڭ 128-بابىنا سايكەس ۋاقىتشا ۇستاۋ يزولياتورىنا قامالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«تەرگەۋ بارىسىندا ەر ادامنىڭ بەيتانىس ادامداردىڭ سەنىمىنە كىرىپ، الماتى قالاسىنىڭ كەز كەلگەن اۋدانىندا جەر تەلىمدەرىن، جىلجىمايتىن مۇلىكتى تىركەۋگە، زاڭداستىرۋعا جانە جەر تەلىمىنە مەملەكەتتىك اكتىلەردى الىپ بەرەمىن دەپ ۇسىنىس جاساعانى انىقتالدى. كۇدىكتى باستاپقى تولەمدى الىپ، سودان كەيىن كليەنتتىڭ اقشاسىمەن جوعالىپ كەتتى. قازىرگى ۋاقىتتا ءبىزدىڭ بولىمشەگە بەس ادام ارىزبەن جۇگىندى»، – دەيدى المالى اۋداندىق پوليسيا باسقارماسىنىڭ باستىعى ولجاس ءشارىپوۆ.
پوليسيا قىزمەتكەرلەرى كۇدىكتىنىڭ قالانىڭ باسقا اۋداندارىندا دا وسىعان ۇقساس قىلمىستارعا قاتىسى بولۋى مۇمكىن ەكەنىن جوققا شىعارمايدى. وسىعان بايلانىستى پوليسيا قىزمەتكەرلەرى ازاماتتاردى كۇدىكتىنى تانىعان جاعدايدا مىنا تەلەفون نومىرلەرىنە حابارلاسۋعا شاقىرادى: 8-705-555-77-63 جانە 8-778-591-91-35. ق ر قك-نىڭ 201-بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى. ق ر كونستيتۋسياسىنىڭ 77-بابى 3ء-بولىمى، 1-تارماعى، ق ر قك-نىڭ 19-بابى 1-تارماعىنا ساي كەز كەلگەن ازامات سوت شەشىمى زاڭدى كۇشىنە ەنگەنگە دەيىن كىناسىز دەپ سانالادى.