تەستىلەۋ 28 ساۋىردە باستالىپ 14 مامىرعا دەيىن جالعاسادى.
بيىل ۇلتتىق ءبىرىڭعاي تەست تاپسىرۋعا 130 مىڭنان استام تالاپكەر ءوتىنىش بەردى. بۇل تۋرالى ق ر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتى ديرەكتورى ادىلەت تويبايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بيىل ۇلتتىق ءبىرىڭعاي تەستىلەۋ 28 ساۋىردە باستالىپ، 14 مامىرعا دەيىن جالعاسادى. وتىنىشتەردى قابىلداۋ ادەتتەگىدەي ۇلتتىق تەستىلەۋ ورتالىعىنىڭ سايتىندا جۇرگىزىلىپ جاتىر. وسى كۇنگە دەيىن 130 مىڭنان استام تالاپكەر ءوز وتىنىشتەرىن بەرىپ ۇلگەردى. وسى جىلدىڭ تۇلەكتەرى ءۇشىن اسا ماڭىزدى جاڭالىقتىڭ ءبىرى - ول تالاپكەردىڭ ەكى رەت نەگىزگى ۇبت تاپسىرۋعا مۇمكىندىك بەرىلىپ وتىر. دەمەك، ۇبت كەزىندە تەستىلەۋشىنىڭ تەست تاپسىرۋعا ەكى مۇمكىندىگى بار. ەكەۋىنىڭ ءبىرىنىڭ ناتيجەسىن تاڭداپ، كونكۋرسقا قاتىسا الادى. ۇبت 16 مامىر مەن 5 شىلدە ارالىعىندا وتەدى»، - دەدى دەپارتامەنت ديرەكتورى ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.
ونىڭ اتاپ وتۋىنشە، نەگىزگى ۇبت-عا ورتا ءبىلىم بەرۋ ۇيىمدارىنىڭ وسى جىلعى تۇلەكتەرى؛ ورتا ءبىلىم بەرۋ ۇيىمدارىنىڭ وتكەن جىلعى بىتىرۋشىلەرى مەن تەحنيكالىق جانە كاسىپتىك نەمەسە ورتا بىلىمنەن كەيىنگى ءبىلىم بەرۋ ۇيىمدارىنىڭ بىتىرۋشىلەرى جانە باسقا دا ساناتتاعى تالاپكەرلەر قاتىسا الادى.
«پاندەردىڭ سانى وزگەرىسسىز قالادى – ءۇش مىندەتتى جانە ەكى تاڭداۋ بويىنشا. تاپسىرمالارىنىڭ سانى – 120. وزگەرىس بولعان جوق. ونىڭ ىشىندە قازاقستان تاريحىنان - 15، ماتەماتيكالىق ساۋاتتىلىقتان - 15، وقۋ ساۋاتتىلىعىنان - 20 جانە ەكى بەيىندىك پاننەن 35 سۇراقتان بولادى. ەڭ جوعارعى ۇپاي سانى – 140. تەستىلەۋدىڭ جالپى ۋاقىتى – 4 ساعات»، دەدى ادىلەت تويبايەۆ.