ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ ناۋرىزداعى ۇبت قالاي وتكەنى جايلى مالىمەت تاراتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ونىڭ ايتۋىنشا، ەڭ كوپ تاڭدالعان بەيىندىك پاندەر كومبيناسيالارى وزگەرمەگەن.
ولار:
- «ماتەماتيكا-فيزيكا» (25%)
- «حيميا-بيولوگيا» (17%).
ەڭ از تاڭدالاتىن كومبيناسيا «حيميا-فيزيكا» (0،13%). بۇل پاندەردى تاپسىرىپ «حيميالىق ينجەنەريا جانە پروسەستەر» ءبىلىم باعدارلاماسىن تاڭداۋعا بولادى.
63 ادام سمارتفونداردى، شپارگالكالاردى جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەستىلەۋدەن ءوتۋ مۇمكىندىگىنەن ايىرىلدى.
135 ادام تەستىلەۋ كەزىندە ەرەجەلەردى بۇزعانى ءۇشىن اۋديتوريادان شىعارىلدى، ولاردىڭ ناتيجەلەرى جويىلدى.
«تەستىلەنۋشىلەر تەلەفونداردى، قۇلاققاپتاردى، سمارت-ساعاتتاردى، شپارگالكالاردى جانە كالكۋلياتورلاردى الىپ كىرمەكشى بولعان. كالكۋلياتور، مەندەلەيەۆ جانە تۇزداردىڭ ەرىگىشتىك كەستەلەرى كومپيۋتەرگە جۇكتەلگەندىگىن قايتادان ەستەرىڭىزگە سالا كەتەيىن»، - دەپ ەسكەرتتى رۋسلان ەمەلبايەۆ.