بيىلعى نەگىزگى ۇبت-عا ءوتىنىش قابىلداۋ 12 ساۋىردە باستالادى.
عىلىم جانە جوعارعى ءبىلىم مينيسترلىگىنىڭ مالىمەتىنشە، نەگىزگى ۇبت-عا ءوتىنىش 12-25 ءساۋىر ارالىعىندا قابىلدانادى، دەپ حابارلايدى aqshamnews.kz
ونىڭ ىشىندە 12-18 ءساۋىر ارالىعىندا ءبىر رەت ءوتىنىش بەرۋگە، 19-25 ءساۋىر ارالىعىندا ءبىر نەمەسە ەكى رەت ءوتىنىش بەرۋگە بولادى. تەستىلەۋدىڭ ءوزى 16 مامىردا باستالىپ، 5 شىلدەگە دەيىن جالعاسادى. تالاپكەرلەر نەگىزگى ۇبت-نى ەكى رەت تاپسىرىپ، ەڭ ۇزدىك ناتيجەمەن گرانت كونكۋرسىنا قاتىسا الادى، - دەلىنگەن ۆەدومستۆو حابارلاماسىندا.
ۇبت-عا قاتىسۋ ءۇشىن ۇلتتىق تەستىلەۋ ورتالىعىنىڭ سايتى نەمەسە UTO.kz قوسىمشاسى ارقىلى ءوتىنىش بەرۋگە بولادى. تالاپكەرلەر تەستىلەۋ كۇنىن، ۋاقىتىن جانە پۋنكتىن وزدەرى تاڭدايدى. بۇل رەتتە ولار ەكى مۇمكىندىك ءۇشىن بەيىندىك پاندەردىڭ ءبىر عانا كومبيناسياسىن بەلگىلەيدى.
تالاپكەرلەردىڭ نەگىزگى ۇبت-عا دايىندىعىن جاقسارتۋ ماقساتىندا ەنگىزىلگەن ءار ءپان بويىنشا جەكە تاقىرىپتىق تالداۋ بار. ياعني ءار ۇبت-دان كەيىن (قاڭتار، ناۋرىز) تۇلەكتەرگە جەكە تاقىرىپتىق تالداۋ بويىنشا ءبىلىمىن ارتتىرۋ ۇسىنىلادى. سونىمەن قاتار ءبىرىنشى مۇمكىندىكتى تاپسىرعاننان كەيىن ولار ەكىنشى مۇمكىندىككە دەيىن دايىندىقتارىن جاقسارتا الادى. ودان بولەك ونلاين بايقاۋ سىناقتارى ىسكە قوسىلعان. وقۋ جىلىنىڭ باسىندا ۇتو سايتىندا تەست تاپسىرمالارى قۇراستىرىلعان وقۋلىقتار ءتىزىمى مەن تەست جوسپارى؛ "قازاقستان تاريحى" جانە "دۇنيەجۇزى تاريحى" پاندەرى بويىنشا 100 تاريحي داتا ءتىزىمى؛ "ينفورماتيكا" پانىنەن تەرميندەر ءتىزىمى؛ "قازاق ادەبيەتى" جانە "ورىس ادەبيەتى" بويىنشا ادەبي شىعارمالار ءتىزىمى جاريالاندى.
ۇبت-داعى پاندەردىڭ سانى وزگەرىسسىز قالادى، ياعني ۇشەۋى مىندەتتى جانە ەكەۋى تاڭداۋ بويىنشا. ۇبت تاپسىرمالارىنىڭ سانى – 120. ونىڭ ىشىندە "قازاقستان تاريحىنان" 20 تاپسىرما، "وقۋ ساۋاتتىلىعىنان" 10 تاپسىرما، "ماتەماتيكالىق ساۋاتتىلىقتان" 10 تاپسىرما جانە ەكى بەيىندىك ءپان بويىنشا 40 تاپسىرمادان. جوعارى بالل – 140.
تەستىلەۋ ۋاقىتى – 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك.
اكادەميالىق ادالدىقتى قامتاماسىز ەتۋ ماقساتىندا ۇبت-عا قاتىسۋشى ءار ادام جەكە جاسالعان تەست نۇسقاسىن الادى. ەمتيحان كەزىندە تەستىلەۋ باعدارلاماسىندا كالكۋلياتور، حيميالىق ەلەمەنتتەردىڭ پەريودتىق جۇيەسى جانە تۇزداردىڭ ەرىگىشتىك كەستەسى قولجەتىمدى بولادى. سونىمەن قاتار تالاپكەرلەرگە ىڭعايلى بولۋ ءۇشىن كەستەلەردىڭ قاعاز نۇسقالارى دا بەرىلەدى.