ۇكىمەتتە وتكەن بريفينگتە عىلىم جانە جوعارى ءبىلىم ءمينيسترى ساياسات نۇربەك 2025 جىلى ۇلتتىق ءبىرىڭعاي تەست تاپسىرۋدىڭ جاڭا فورماتى پيلوت جوبا رەتىندە ىسكە قوسىلاتىنىن ايتتى.
مينيستر الەمنىڭ كوپ ەلىندە تەستىلەۋدى الىپ تاستاۋ ماسەلەسى قىزۋ تالقىلانىپ جاتقانىن ايتتى، دەپ حابارلايدى Almaty-akshamy.kz.
"ماسەلەن اقش پاندەميا كەزىندە ستاندارتتى تەستتى الىپ تاستادى جانە ۋنيۆەرسيتەتتەر وتە كۇردەلى ماسەلەگە تاپ بولدى. ورتالىقتاندىرىلماعان وقۋعا ءتۇسۋ جۇيەسىنە قاراماستان، كەم دەگەندە ستۋدەنتتەردى باعالاۋ، سالىستىرۋ جانە ىرىكتەۋ ءۇشىن قانداي دا ءبىر ستاندارت قاجەت"، – دەيدى ساياسات نۇربەك.
ونىڭ ايتۋىنشا، مينيسترلىك 2021 جىلدان باستاپ دۇنيەجۇزىلىك بانكتىڭ قولداۋىمەن ۇبت فورماتىن قايتا قۇرۋ جانە ەڭ باستىسى – تەست سۇراقتارىنىڭ مازمۇنىن تۇبەگەيلى قايتا وڭدەۋ بويىنشا ۇلكەن جوبانى ىسكە قوسقان.
"الدىڭعى جىلى ءبىز ەكى باعىت بويىنشا جۇمىس ىستەدىك. ءبىرىنشىسى – جاڭا فورمات بويىنشا تەست دايىنداۋ. بارلىق سۇراقتاردى مازمۇندى تۇردە قايتا قاراۋ كەرەك بولدى. وتكەن اپتادا بۇل كومپونەنت اياقتالدى. تەست دايىنداۋدى الەمگە ايگىلى فرانسۋز كومپانياسى جۇرگىزدى. جاڭا مودەل بويىنشا 350 تەستولوگ دايىندالدى"، – دەدى مينيستر.
ەكىنشى باعىت – فينليانديالىق كومپانيالار توبىمەن ۇبت قۇرىلىمى بويىنشا جۇمىس.
"بۇل ارنايى وقىتىلعان تەستولوگتار توبى SIT فورماتىنا ۇقساس جاڭا ادىستەمە بويىنشا سۇراقتار دايىنداي باستايدى. بۇل – حالىقارالىق دەڭگەيدە تانىلعان تەست. وعان قوسا، ءبىز بازانى قۇرعاندا جاڭا ۇبت فورماتىن پيلوت تۇردە باستاۋ ءۇشىن كەم دەگەندە 50 مىڭ سۇراق ازىرلەۋىمىز كەرەك. مۇندا دا مۇقيات، ۇقىپتى بولۋىمىز كەرەك. ويتكەنى فورماتتىڭ كۇرت وزگەرۋى دە ۇلكەن پروبلەمالارعا الىپ كەلەدى، جوعارى سىنىپ وقۋشىلارىن وسى فورماتقا دايىنداۋ قاجەت"، – دەپ اتاپ ءوتتى ساياسات نۇربەك.
ۆەدومستۆو باسشىسى وسى جىلدان باستاپ مينيسترلىك ۇلكەن پيلوت جوباعا دايىندىق باستايتىنىن ايتتى.
"ءبىز پيلوت جوبانى كەلەسى جىلى باستايمىز. جوبا ۇبت فورماتىن بىردەن وزگەرتپەيدى، بەلگىلى ءبىر پيلوتتىق رەجيمدە ىسكە قوسىلادى. بىرتە-بىرتە ءبىز SIT حالىقارالىق ستاندارتىنا كوشەمىز، وندا ءار تالاپكەردىڭ ءوزى تەستىلەۋ ورنىن، ۋاقىتىن تاڭدايدى، دايىندالادى، تاپسىرادى، سەرتيفيكات الادى، سونىمەن وقۋعا تۇسەدى"، – دەدى مينيستر.