ناۋرىز ايىنداعى ۇبت باستالعاننان بەرى 13019 ادام تەست تاپسىردى. ونىڭ ىشىندە تالاپكەرلەردىڭ 66%-ى قازاق تىلىندە، 33%-ى ورىس تىلىندە، 26 ادام اعىلشىن تىلىندە تەستىلەۋدەن ءوتتى.
ۇبت باستالعالى شەكتى بالدى 60% تالاپكەر جينادى. ورتاشا بالعا كەلەتىن بولساق، ول 59 بالدى قۇرادى. ەڭ جوعارى بالل – 137.
ناۋرىز ايىنداعى ۇبت-نىڭ ءبىرىنشى اپتاسى اياقتالدى. تەستىلەۋ 30 ناۋرىزعا دەيىن وتەدى. تەستىلەۋگە قاتىسۋعا 118 505 ءوتىنىش كەلىپ ءتۇستى. قازىرگى تاڭدا تەستكە قاتىسۋشىلاردىڭ باسىم بولىگى، اتاپ ايتقاندا، 17،11%-ى «ماتەماتيكا-فيزيكا» پاندەر كومبيناسياسىن 15%-ى شىعارماشىلىق باعىتتى تاڭداعان. 14%-ى «بيولوگيا-حيميا» كومبيناسياسىن تاڭداعان. ەڭ از تاڭدالعان كومبيناسيا – «حيميا-فيزيكا»، ونى 27 ادام تاپسىرعان.
ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا ۇبت-عا ءبىرىنشى اپتادا 43 تالاپكەر قاتىسقانىن ايتا كەتكەن ءجون.
تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياسياعا بەرە الادى.سەرتيفيكات اپەللياسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.
بۇگىنگى تاڭدا 9 تالاپكەر سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 11 ادام شىعارىلىپ، ولاردىڭ ناتيجەلەرى جويىلدى. وزگە تۇلعالار انىقتالعان جوق.
ايتا كەتسەك، 2024 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى.