ۇبج دامىتۋ شەڭبەرىندە وقىتۋدىڭ جاڭا سيكلى باستالدى

وقىتۋ اي سايىن جۇرگىزىلەدى.

ۇلتتىق بىلىكتىلىك جۇيەسىن (بۇدان ءارى – ۇبج) دامىتۋ شەڭبەرىندە ق ر ەڭبەكمينى جانىنداعى كاسىپتىك بىلىكتىلىك جونىندەگى ۇلتتىق ورگان مەملەكەتتىك ورگاندار مەن جۇمىس بەرۋشىلەر قاۋىمداستىقتارى ءۇشىن وقىتۋ سەمينارلارىنىڭ كەزەكتى لەگىن اشتى، دەپ حابارلايدى Almaty-akshamy.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ. 

ءبىرىنشى سەمينارعا ءتۇرلى مينيسترلىكتەردەن، جەرگىلىكتى اتقارۋشى ورگانداردان، «اتامەكەن» ۇكپ جانە وكپ، جۇمىس بەرۋشىلەر قاۋىمداستىعىنان، ءبىلىم بەرۋ جانە ت. ب ۇيىمداردان 70-تەن استام ادام قاتىستى.

وقىتۋ بارىسىندا كاسىپتىك بىلىكتىلىك جونىندەگى ۇلتتىق ورگاننىڭ ساراپشىسى دينارا كاپيتونوۆا بىلىكتىلىك جۇيەسىنىڭ بارلىق قاتىسۋشىلارىنىڭ ءتيىمدى ءوزارا ءىس-قيمىلىنا ارنالعان Career Enbek سيفرلىق پلاتفورماسىنىڭ تانىستىرىلىمىن وتكىزدى. پلاتفورما ەڭبەك نارىعىنداعى مانساپتى دامىتۋ تۋرالى اقپاراتقا، سونداي-اق ۇلتتىق جانە سالالىق بىلىكتىلىك شەڭبەرلەرى، كاسىپتىك ستاندارتتار جانە كاسىپتەر ءتىزىلىمى سياقتى ۇبج وزەكتى قۇرالدارىنا قول جەتكىزۋدى قامتاماسىز ەتەدى.

سەميناردا ۇلتتىق بىلىكتىلىك جۇيەسىنىڭ ماقساتتارى مەن مىندەتتەرى، ەۋروپالىق بىلىكتىلىك شەڭبەرىنىڭ نەگىزگى ەلەمەنتتەرى، دەڭگەيلەرى مەن دەسكريپتورلارى تالقىلاندى. ءىس-شارا پىكىر الماسۋ جانە ماڭىزدى ماسەلەلەردى تالقىلاۋ الاڭىنا اينالدى.