ۋاعىز بەن ۋاقىت

Almaty-akshamy.kz سايتىندا بۇگىن جارىق كورگەن جاڭالىقتارعا شولۋ – كۇن كەرۋەنى

كىبىسە جىل دەگەن نە؟

بۇل ءار ءتورت جىل سايىن كەلەتىن، اقپان 29 كۇنگە تولاتىن،  366 كۇننەن تۇراتىن جىل. تاۋلىكتىڭ شيرەك بولشەگىن ءار جىل كۇنتىزبەسىنە قوسىپ ايتۋعا دا، ەسەپتەۋگە دە ىڭعايسىز بولعاندىقتان، شيرەكتىڭ ءتورت جىلدا ءبىر تاۋلىكتىك مەزگىل قۇرايتىنى ەسەپتەلىپ، ءتورتتىڭ الدىڭعى 365 تاۋلىكتەن تۇراتىن ءۇش جىلى – جاي جىل، 366 تاۋلىكتەن تۇراتىن سوڭعى جىلى – كىبىسە اتانعان.

ۇلتتىق ستاتيستيكا بيۋروسىنىڭ اقپاراتىنا ساي، 1991 جىلدان بەرى قازاقستاندا كىبىسە كۇنى، ياعني 29 اقپاندا 5110 ادام دۇنيەگە كەلگەن.  ولاردىڭ 2707ء-سى – ەر ادامدار بولسا، 2403ء-ى – ايەلدەر. 29 اقپاندا دۇنيەگە كەلگەن ادامدار تاڭداۋلى، ەرەكشە قابىلەتتى، تالانتتى بولادى.

ۋاقىت اۋىساردا نە ىستەۋ كەرەك؟

سيفرلىق دامۋ مينيسترلىگى ساعات بەلدەۋىنىڭ وزگەرۋىنە قاتىستى ۇسىنىستاردى جاريالادى. بۇگىن تۇندە ماڭعىستاۋ، اتىراۋ، باتىس قازاقستان، اقتوبە جانە قىزىلوردا وبلىستارىنان باسقا بارلىق ايماقتار ءبىرىڭعاي ۋاقىت بەلدەۋىنە كوشەدى. كوپتەگەن پايدالانۋشىلار ۇيالى تەلەفوندار مەن قۇرىلعىلاردىڭ اقپاراتتىق جۇيەلەرىنەن قازاقستاننىڭ ءبىرىڭعاي ۋاقىت بەلدەۋىنە (UTC+5) كوشۋ تۋرالى حابارلامالاردى الا باستادى. سيفرلىق دامۋ مينيسترلىگى قازاقستاندىقتارعا ولاردى جاڭارتۋ جانە جاڭا ۋاقىت بەلدەۋىنە ۋاقتىلى كوشۋ بويىنشا امبەباپ نۇسقاۋلىقتاردى ۇسىنادى.

دۋبايدا قازاقستاننىڭ ساۋدا ءۇيى اشىلدى

بىرىككەن اراب امىرلىكتەرىندە ءوتىپ جاتقان قازاقستاندىق كاسىپورىنداردىڭ ساۋدا-ەكونوميكالىق ميسسياسى اياسىندا 28 ميلليون اقش دوللارىنا كەلىسىم جاسالدى. وتاندىق بيزنەس-دەلەگاسيانى ساۋدا جانە ينتەگراسيا ءمينيسترى ارمان شاققالييەۆ باستاپ باردى. ءىس-شاراعا 60-تان استام وتاندىق كومپانيا وكىلدەرى قاتىستى.

وتكەن جىلى قازاقستان مەن امىرلىكتەر اراسىنداعى تاۋار اينالىمى 329 ملن اقش دوللارىن قۇرادى. قازاقستاندىق ەكسپورت 210 ميلليوننان استام، امىرلىكتەر ءبىزدىڭ ەلگە شامامەن 119 ميلليون دوللاردىڭ تاۋارىن جونەلتكەن. ساۋدا-ەكونوميكالىق الەۋەت جوعارى، ەلدەر ساۋدا كولەمىن 1 ميللياردقا جەتكىزۋدى جوسپارلاپ وتىر. 2 كۇندىك كەلىسسوزدەر ناتيجەسىندە تاراپتار 28 ميلليون 650 مىڭ دوللاردىڭ كەلىسىمىنە قول قويدى.

وزبەك اۋەجايىنداعى وزگەرىستەر

جاڭا سامارقاند اۋەجايىن باسقارۋدى جەكە سەرىكتەستىككە بەرۋ جولاۋشىلار اعىنىنىڭ ءتورت ەسەگە ارتىپ، ءبىر جىلدا ميلليون ادامعا جەتۋىنە ىقپال ەتتى. بۇحارا، نامانگان، ۇرگەنىش جانە ءاندىجان اۋەجايلارى جەكە باسقارۋعا بەرىلىپ، جاڭارتىلادى. ونەركاسىپ شىعىندارىن 20%-عا قىسقارتۋ شارالارىن قابىلدايدى. جانارماي شىعىنى جوعارى ەسكى ۇشاقتار ساتىلىپ، زاماناۋي ءارى ۇنەمدى ۇشاقتار اكەلىنەتىن بولادى. 72 باعىت بويىنشا وڭتايلى ۇشۋ باعىتىن تاڭداۋ ارقىلى جانارماي شىعىنى ايتارلىقتاي تومەندەيدى. پايدالانىلمايتىن جانە كىرىس اكەلمەيتىن اكتيۆتەر ساتىلىمعا شىعارىلادى.

ريەلتورلاردى باقىلاۋ كەرەك!

دەپۋتات ريەلتورلاردى باقىلاۋعا الۋدى تالاپ ەتۋدە.  ق ر پرەمەر-مينيسترىنىڭ ورىنباسارى – ۇكىمەت اپپاراتىنىڭ باسشىسى عالىمجان قويشىبايەۆقا ساۋال جولداعان دەپۋتات ولجاس قۇسپەكوۆ وسى تۋرالى ايتتى.

«ماسەلە مىنادا، كليەنتتەردى قۇلدىققا تۇسىرەتىن شارتتار، كەيبىر «ەرەكشە شارتتار» مەنشىك يەلەرىن ءوز مۇلكىنە بيلىك ەتۋ قۇقىعىنان ايىرادى. قازاقستاندىقتار «اربيتراجدىق باپتان» كوپ زارداپ شەگەدى. بۇل بارلىق جانجالدار تەك اربيتراجدا، ياعني جەكە سوتتا شەشىلەدى دەگەن ءسوز. ءبىراق، سۋديالاردان ايىرماشىلىعى، اربيترلەر ەشقانداي جاۋاپكەرشىلىك كوتەرمەيدى جانە ولاردى ءسوز بايلاسۋدان، سىبايلاستىقتان، الداۋ مەن الاياقتىقتان ەشتەڭە توقتاتا المايدى. اربيتراجدا شەشىلەتىن بارلىق داۋلار ريەلتورلىق كومپانيالاردىڭ پايداسىنا شەشىلدى. مەملەكەتتە ريەلتورلاردى دا، اربيتراجدىق سوتتاردى دا باقىلاۋدىڭ ەشقانداي قۇرالدارى جوق، بۇل ازاماتتاردىڭ قۇقىقتارىن قورعاۋدى تولىق قامتاماسىز ەتۋگە مۇمكىندىك جوق دەگەندى بىلدىرەدى»، - دەپ ءتۇسىندىردى دەپۋتات.

ۇقك تەرروريزمدى ناسيحاتتاعان ازاماتتى ۇستادى

شىمكەنتتە ۇقك قىزمەتكەرلەرى راديكالدى يدەولوگيانى ناسيحاتتاۋشىنى ۇستادى. ۇستالعان ازاماتقا قاتىستى قىلمىستىق كودەكستىڭ 256-بابى 2-بولىگى بويىنشا قىلمىستىق ءىس قوزعالدى. 256-باپتىڭ وسى بولىگىنىڭ سانكسياسى مۇلكى تاركىلەنىپ، جەتى جىلدان 12 جىلعا دەيىنگى مەرزىمگە باس بوستاندىعىنان ايىرۋدى كوزدەيدى.

ۋاعىز ايتاتىن اۋىز

قۇران ۇستاپ، تاسپيح تارتقاننىڭ ءبارى ۋاعىز ايتا المايتىن بولدى. ۋاعىزشىلاردىڭ استانا وتكەن العاشقى فورۋمىندا باس ءمۇفتي جاماعاتقا ادال مەن ارامنىڭ ارا جىگىن اجىراتىپ، جالپاق جۇرتقا ۋاعىز ايتاتىن مولدالاردىڭ تۇعىرناماسىن بەكىتتى.

«مۇنداعى باستى ماقسات – ەلدى اداستىرىپ تەرىس جولعا باعىتتاعان ءدىني قىزمەتكەرلەردىڭ، ۋاعىزشىلاردىڭ ءىزىن كەسۋ» دەيدى ناۋرىزباي قاجى تاعان ۇلى.

Air Astana-نىڭ كەستەسى وزگەردى

قازاقستاندا ءبىرىڭعاي ۋاقىت بەلدەۋىنە كوشۋگە بايلانىستى Air Astana رەيستەر كەستەcىنە وزگەرىستەر ەنگىزدى. وزگەرىستەر 1-31 ناۋرىز ارالىعىندا الماتى، استانا، شىمكەنت، وسكەمەن جانە قوستاناي باعىتتارى بويىنشا جوسپارلانعان باعىتتارعا قاتىستى. رەيستەرى وزگەرىسكە ۇشىرايتىن جولاۋشىلارعا وزگەرتىلگەن ۇشۋ ۋاقىتى تۋرالى SMS-حابارلامالار مەن برونداۋ كەزىندە قالدىرعان ەلەكتروندىق پوشتالارىنا حاتتار جىبەرىلەدى.

مەترونىڭ كەستەسى وزگەرمەيدى

ساعات بەلدەۋىنىڭ اۋىسۋى كەزىندە الماتى مەتروپوليتەنى شتاتتىق رەجيمدە، كەستەسى وزگەرىسسىز قىزمەت كورسەتەدى. 29 اقپاننان 1 ناۋرىزعا قاراعان ءتۇنى الماتى ۋاقىتىمەن ساع.00-10-عا دەيىن جۇمىس جاساپ، ال 1 ناۋرىز كۇنى جاڭا بەلدەۋ بويىنشا ساع. 06-20-دا مەترو قايتا ىسكە قوسىلاتىن بولادى.