بۇگىن ۇگىت جۇمىستارى اياقتالادى.
باس پروكۋراتۋرا 19 ناۋرىزدا وتەتىن ءماجىلىس جانە ءماسليحاتتار دەپۋتاتتارىن سايلاۋ الدىنداعى تىنىشتىق كۇنى تالاپتارىن ەسكە سالدى، دەپ حابارلايدى Almaty-akshamy.kz
"بۇگىن ساعات 24:00-دە سايلاۋ الدىنداعى ۇگىت جۇمىستارىنىڭ كەزەڭى اياقتالادى. ەرتەڭ، 18 ناۋرىزدا جانە داۋىس بەرۋ كۇنى – 19 ناۋرىزدا كەز كەلگەن ۇگىتتى جۇرگىزۋگە تىيىم سالىنادى. 14 ناۋرىزدان باق-تا ساۋالناما ناتيجەلەرىن، سايلاۋ ناتيجەلەرىنىڭ بولجامدارىن، سايلاۋعا، كانديداتتاردى قولداۋعا داۋىس بەرۋگە بايلانىستى وزگە زەرتتەۋلەردى جاريالاۋعا دا جول بەرىلمەيدى"، - دەدى باس پروكۋروردىڭ ورىنباسارى جاندوس ومىرالييەۆ ورتالىق سايلاۋ كوميسسياسىنىڭ وتىرىسىندا.
سونداي-اق ول ساۋالناماعا قاتىستى ءبىرقاتار تالاپتارعا توقتالدى.
مۇنداي ساۋالنامانى داۋىس بەرۋگە ارنالعان ءۇي-جايدا نەمەسە پۋنكتتە جۇرگىزۋگە بولمايدى ("قازاقستان رەسپۋبليكاسىنداعى سايلاۋ تۋرالى" كونستيتۋسيالىق زاڭنىڭ 28-بابىنىڭ 9-تارماعى).
ولاردى، تىركەلگەن جانە ورتالىق سايلاۋ كوميسسياسىن جازباشا تۇردە حاباردار ەتكەن زاڭدى تۇلعالار عانا سايلاۋ ۋچاسكەلەرىنەن شىعا بەرىستە جۇرگىزە الادى.
اتالعان ساۋالنامالاردىڭ ناتيجەلەرىن باق-دا داۋىس بەرۋ كۇنىنەن كەيىن، ياعني 2023 جىلعى 20 ناۋرىز ساعات 00:00-دەن باستاپ جاريالاۋعا رۇقسات ەتىلەدى.
"كونستيتۋسيالىق زاڭنىڭ وسى تالاپتارىن ورىنداماۋ اكىمشىلىك قۇقىق بۇزۋشىلىق تۋرالى كودەكستىڭ 102 جانە 120-باپتارىندا كوزدەلگەن جاۋاپتىلىققا اكەپ سوعادى"، - دەدى جاندوس امىرالييەۆ.
اتالعان زاڭ تالاپتارى پارلامەنت ءماجىلىسى دەپۋتاتتارىمەن قاتار، بارلىق دەڭگەيدەگى ءماسليحاتتار دەپۋتاتتارىنىڭ كەزەكتەن تىس سايلاۋىنا دا قاتىستى.
باس پروكۋروردىڭ ورىنباسارى سايلاۋ زاڭناماسىنىڭ نورمالارىن ساقتاۋدا ەرەكشە ءرول سايلاۋ كوميسسيالارىنىڭ مۇشەلەرىنە جۇكتەلەتىنىن اتاپ ءوتتى.
"سايلاۋدىڭ جاريالىلىعى مەن اشىقتىعىنا اسەر ەتەتىن قاتىسۋشىلاردىڭ تاعى ءبىر ساناتى، ولار – ساياسي پارتيالار، باسقا دا اككرەديتاسياسى بار قوعامدىق بىرلەستىكتەر، قازاقستاننىڭ كوممەرسيالىق ەمەس ۇيىمدارىنىڭ بايقاۋشىلارى جانە كانديداتتاردىڭ سەنىمدى ادامدارى.ولاردىڭ قىزمەتى، قۇقىقتارى مەن مىندەتتەرى كونستيتۋسيالىق زاڭمەن رەتتەلگەن. بۇل زاڭ بايقاۋشىلار مەن سەنىمدى ادامدارعا قۇقىقتارمەن قاتار، ءبىرقاتار مىندەتتەردى جۇكتەيدى. ولاردىڭ ساقتالماۋى ءتيىستى قۇقىقتىق سالدارعا اكەپ سوعادى"، - دەدى ول.