Almaty-akshamy.kz سايتىندا بۇگىن جاريالانعان جاڭالىقتارعا شولۋ – كۇن كەرۋەنى
كۇنارا جەر قوزعالاتىن بولدى
الماتىدا 2 بالل كولەمىندە جەر سىلكىنىسى سەزىلدى. سەيسمولوگيالىق زەرتتەۋ ينستيتۋتىنا قاراستى سەيسميكالىق ستانسالار جەلىسى 6 ناۋرىز كۇنى الماتى ۋاقىتىمەن 05:09 كەزىندە جەر سىلكىنىسىن تىركەدى. ءزىلزالا وشاعى الماتى قالاسىنان وڭتۇستىك-شىعىسقا قاراي 266 شاقىرىم جەردە جۇڭگو اۋماعىندا ورنالاسقان.
كاسىپكەر مۇفتيگە قۇلاق اسا ما؟
دەگەنمەن ەلىمىزدىڭ باس ءمۇفتيى جىلداعى ادەتىنشە كاسىپكەرلەرگە ۇندەۋ جاسادى.
«كاسىپكەرلەردى الەۋمەتتىك ماڭىزى بار ازىق-تۇلىكتەردىڭ باعاسىنا مۇمكىندىگىنشە جەڭىلدىك جاساۋعا ۇندەيمىن. قوعامدىق تاماقتانۋ ورىندارىندا اۋىزاشار ءمازىرىن حالىققا ىڭعايلى باعامەن ۇسىنۋ دا – ساۋاپتى ءىستىڭ ءبىرى. دۇكەندەردە كۇللى جاماندىقتىڭ باستاۋى بولعان اراق-شاراپ ساتىلماسا دەگەن تىلەگىمىزدى جەتكىزەمىز. سونىمەن قاتار بارشا حالىقتىڭ ورتاق يگىلىگى ءۇشىن سالىنىپ جاتقان جول، كوپىر، مەكتەپ، مەشىت، مەدرەسە، بالاباقشا، سپورت كەشەنى سىندى ماڭىزدى عيماراتتارعا از دا بولسا ۇلەس قوسىپ، بەلسەندىلىك تانىتۋعا شاقىرامىن» دەدى قمدب ءتوراعاسى.
قازاقستاندىقتار تۇڭعىش رەت دۇنيەجۇزىلىك دوداعا شىقپاق
موتوسيكل مىنگەن جىگىتتەردىڭ ايتۋلى جارىسى ءساۋىر ايىندا فرانسيا مەن بەلگيا جانە جاپونيا تراسسالارىندا وتەدى. قازاقستاندىق كلۋب ساپىندا جەرگىلىكتى سپورتشىلاردان بولەك چەحيا ازاماتتارى دا بار.
«قازاقستاندا موتوسپورت ەندى عانا قاناتىن كەڭگە جايىپ كەلەدى. ءقازىر ەلدىڭ وڭتۇستىك جانە باتىس ايماقتارىندا موتوسپورتقا قىزىعۋشىلار كوپ. چەحيادان تاجىريبەلى مامانداردى شاقىرتۋ ارقىلى قازاق جاستارىن تاربيەلەسەك دەگەن ماقساتىمىز بار. موتوسپورتى دامىعان يتاليا، يسپانيا، فرانسيا سەكىلدى ەلدەرمەن باسكە ءتۇسۋ قيىن. دەگەنمەن ۇزدىك ۇشتىكتەن كورىنۋ ءۇشىن كوماندا ايانىپ قالمايدى»، - دەدى كوماندا جەتەكشىسى نۇرعازى ساتبايەۆ.
بارعاندار قايتپادى
ق ر تجم مالىمەتى بويىنشا، جىل باسىنان بەرى ەلىمىزدىڭ سۋ ايدىندارىندا مۇزدىڭ وپىرىلۋى سالدارىنان 2 ادام سۋعا باتىپ كەتتى، 18 ادام قۇتقارىلدى، ونىڭ ىشىندە 3 بالا بار. كوكتەمگى، ياعني مۇزداعى ءقاۋىپتى كەزەڭنىڭ ءالى الدا ەكەنىن ەسكەرۋ قاجەت. وسى كەزەڭدە سۋ ايدىندارىندا ءالى دە قانشا ادامنىڭ ءومىرى قيىلاتىنىن ەلەستەتۋ قيىن.
500 الەۋمەتتىك تولەم
2024 جىلعى قاڭتاردا وتباسىنىڭ سيفرلىق كارتاسىنىڭ كومەگىمەن 499 ازامات SMS-كە كەلىسىم بەرۋ ارقىلى مەملەكەتتىك الەۋمەتتىك ساقتاندىرۋ قورىنان الەۋمەتتىك تولەم الۋ قۇقىعىن پايدالاندى. ونىڭ ىشىندە 493 ادام جۇمىسىنان ايىرىلۋى جانە ءبىر جارىم جاسقا دەيىنگى بالا كۇتىمى بويىنشا 6 ادام تولەم الدى.
5100 سەكسەۋىل
ق ر ەكولوگيا جانە تابيعي رەسۋرستار مينيسترلىگى جانە جەرگىلىكتى اتقارۋشى ورگاندارىنىڭ قولداۋىمەن ارال تەڭىزىنىڭ قۇرعاعان تابانىنا 5100 سەكسەۋىل كوشەتى وتىرعىزىلدى.
ۆولونتەرلەر الماتى، تالعار، استانا، تاشكەنت قالالارىنان جينالدى. ارالارىندا ءتىپتى اقش-تىڭ ەكى ازاماتى بولدى. سونىمەن قاتار قىزىلوردا وبلىسىنىڭ شيەلى، جاڭاقورعان ەلدىمەكەندەرىنىڭ بەلسەندى ازاماتتارى دا ۆولونتەرلەر قاتارىنان كورىندى.
كرەديت تۇسىڭە دە كىرمەيدى
تۇرعىنداردىڭ قارجى ۇيىمدارىنىڭ الدىنداعى بەرەشەگى 19 ترلن تەڭگەگە جەتتى.
«پروبلەمالىق قارىزدارى بار ازاماتتاردىڭ قارىز جۇكتەمەسىنىڭ وسۋىنە جول بەرمەۋ ءۇشىن كرەديتتەر بويىنشا تولەم مەرزىمىن كەشىكتىرۋ 90 كۇننەن اسقان جاعدايدا ولارعا كەپىلسىز تۇتىنۋشىلىق كرەديتتەر بەرۋگە تىيىم سالۋ جونىندە نورما ەنگىزىلەدى. بۇدان باسقا، بانكتەر مەن ميكروقارجى ۇيىمدارى ءۇشىن بارلىق قولدانىستاعى (وتەلمەگەن) تۇتىنۋشىلىق كرەديتتەر بويىنشا تولەم مەرزىمىن كەشىكتىرۋ 90 كۇننەن اسقان سوڭ سىياقى ەسەپتەۋگە تىيىم سالىنادى»،- دەدى دەپۋتات ءۇنزيلا شاپاق.
الماتىدا قۇبىر جارىلدى
تولەبايەۆ پەن ايتەكە بي كوشەلەرىنىڭ قيىلىسىندا جىلۋ قۇبىرىنىڭ جارىلعانىنىڭ كەسىرىنەن ىستىق سۋ مەن جىلۋ بەرۋ ۋاقىتشا توقتاتىلدى.
«الماتى جىلۋ جەلىلەرى» ج ش س اپاتتىق بريگاداسى اپاتتى دەرەۋ جويۋعا كىرىستى.