سولتۇستىك قازاقستان وبلىسىندا پوليسيانىڭ جەدەل ۋاكىلدەرى اسا ءىرى مولشەردەگى گەربيسيد ۇرلىعىن اشۋ ءۇشىن 7 ەلدى مەكەنگە بارىپ، ناتيجەسىندە كۇدىكتىلەردى قولعا ءتۇسىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سقو پوليسيا دەپارتامەنتى باسپا ءسوز قىزمەتىنىڭ مالىمەتىنشە، تايىنشا اۋدانى پوليسيا ءبولىمىنىڭ كەزەكشى بولىمىنە اۋىل شارۋاشىلىق كاسىپورىندارىنىڭ ءبىرىنىڭ قاۋىپسىزدىك قىزمەتىنىڭ باستىعى جۇگىندى. ول جالپى سومماسى 34 ملن تەڭگە بولاتىن گەربيسيد قۇيىلعان 84 قوراپتىڭ ۇرلانعانىن ايتقان. ۋلى حيميكات قۇلىپتى بۇزۋ ارقىلى قويمادان ۇرلانعان. قىلمىستى اشۋعا ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى جۇمىلدىرىلدى. اسا ماڭىزدى ىستەر جونىندەگى اعا جەدەل ۋاكىل اۋداندىق كريمينالدىق پوليسيا قىزمەتكەرىمەن بىرلەسىپ، ۇرلانعان زاتتاردىڭ ساتىلۋى مۇمكىن ورىندارى تۋرالى اقپاراتتى تەكسەرۋ ءۇشىن اۋقىمدى جۇمىس اتقاردى. ءۇش كۇندە ولار سولتۇستىك قازاقستان، اقمولا جانە قوستاناي وبلىستارىنداعى 11 ادامدى تەكسەردى. ناتيجەسىندە سقو تايىنشا اۋدانىنىڭ 22 مەن 32 جاستاعى ەكى تۇرعىنى ۇستالدى. ۇرلانعان گەربيسيدتەر ۇستالعانداردىڭ ءبىرىنىڭ تۋىسىنىڭ ۇيىنەن تابىلىپ، تاركىلەندى.
«قازىرگى ۋاقىتتا كۇدىكتىلەر اقمولا وبلىسىندا قاماۋدا وتىر. ۇرلىق فاكتىسى ق ر قىلمىستىق كودەكسىنىڭ 188-بابى 4-بولىگى بويىنشا سوتقا دەيىنگى تەرگەپ-تەكسەرۋلەردىڭ ءبىرىڭعاي تىزىلىمىندە تىركەلدى. اۋىلشارۋاشىلىق قۇرىلىمدارىنىڭ باسشىلارى ءوز نىساندارىنىڭ تەحنيكالىق نىعايتىلۋىنا ءمان بەرۋلەرى قاجەت. بەينەباقىلاۋ جۇيەسى، مىقتى ەسىك پەن قۇلىپتار، تەرەزەلەردەگى تورلار، كۇزەت پەن باسقا دا قورعاۋ قۇرالدارى قىلمىستىق قولسۇعۋشىلىقتاردان قورعايدى»، - دەيدى سقو پد باستىعىنىڭ ورىنباسارى ەڭبەك سەمبين.