الماتى قالاسىنىڭ ىرگەسىندە ورنالاسقان تۇزدىباستاۋ اۋىلىندا گاز بالونى جارىلىپ، اناسى مەن ۇلى اۋرۋحاناعا ءتۇستى، دەپ حابارلايدى Almaty-akshamy.kz الماتى وبلىسى تجد باسپا ءسوز قىزمەتىنە سىلتەمە جاساپ.
«2 تامىز ساعات 18:07-دە الماتى وبلىسى توتەنشە جاعدايلار دەپارتامەنتىنە الدىن الا مالىمەت بويىنشا تالعار اۋدانىنىڭ تۇزدىباستاۋ اۋىلىندا دوستىق كوشەسىندەگى جەكە تۇرعىن ۇيدە تۇتانۋسىز گاز-اۋا قوسپاسىنىڭ تارسىلى بولعانى تۋرالى حابارلاما ءتۇستى.
وقيعا ورنىنا دەرەۋ الماتى وبلىسى تجد قىزمەتكەرلەرى جىبەرىلدى.
وسى ۇيدەن 2 ادام: 1981 جىلى تۋعان ايەل (3 دارەجەلى كۇيىك، جاعدايى اۋىر) جانە 2001 جىلى تۋعان ۇلى (2 دارەجەلى كۇيىك، جاعدايى اۋىرلىعى ورتاشا دارەجەدە) وبلىستىق اۋرۋحاناعا جاتقىزىلدى.
وقيعانىڭ ءمان-جايى مەن سەبەبى انىقتالىپ جاتىر»، - دەلىنگەن حابارلامادا.