اتىراۋ مەشىتىنىڭ قىزمەتكەرلەرى يمامنىڭ ۇستىنەن ارىزدانىپ جاتىر.
اتىراۋ قالاسىنداعى "قۇسپان مولدا" مەشىتىنىڭ قىزمەتكەرلەرى يمام ەممات عۇماروۆتىڭ ۇستىنەن ارىزدانىپ، جۋرناليست وراز الىمبەككە حات جازعان، دەپ حابارلايدى aqshamnews.kz Ulysmedia.kz-كە سىلتەمە جاساپ.
ولار مەشىم يمامىنىڭ تەرىس قىلىقتارى تۋرالى قمدب ءتوراعاسى، باس ءمۇفتي ناۋرىزباي وتپەنوۆكە قانشاما رەت ارىزدانسا دا، وسى ۋاقىتقا دەيىن وعان بايلانىستى ەشقانداي شارا قولدانىلماي وتىرعانىن ايتادى.
«تومەندەگى ارىزدا ايتىلعان ايىپتاۋدىڭ راس ياكي وتىرىگىن بىلمەدىم. ءمۇفتيات قالاي دا جاماعاتتىڭ جانايقايىنا نازار اۋدارىپ، وسى ارىز بويىنشا تەكسەرۋ جۇرگىزۋى ءتيىس. سەبەبى، مەشىت يمامىن تاعايىنداۋ باس ءمۇفتيدىڭ بۇيرىعى بويىنشا جۇزەگە اسادى. ال مەنىڭ قولىمدا تۇرعان نە بار؟!. مەن اقيقات پەن ادىلدىك ىزدەگەن جالاڭاياق ءجۋرناليستىڭ ءبىرىمىن عوي»، – دەگەن مەشىت جاماعاتىنىڭ حاتىن جاريالاعان جۋرناليست.
ونىڭ ايتۋىنشا، ەممات عۇماروۆ وزىنە لايىقسىز، ءبىراق ءدىن ارقىلى پايدا تاباتىن مەشىت مىنبەرىن ساقتاپ قالۋ ءۇشىن ءمۇفتيات باسشىلىعىنا اتىراۋدىڭ بەكىرەسى مەن قارا ۋىلدىرىعىن اي سايىن جىبەرىپ تۇرادى.
اتىراۋلىق كاسىپكەرلەر مەن مەسەناتتاردىڭ ارقاسىندا ابدەن بايىدى، سونىڭ ارقاسىندا ءۇيىر-ۇيىر جىلقىسى، جۇزدەگەن تۇيە مەن سيىر-قويى بار.
سونىمەن قاتار ەممات عۇماروۆ قۇراندى ءتاجۋيد بويىنشا قاتە وقيدى، ءدىني ءبىلىمى وتە ناشار.
ەڭ سوراقىسى ءتانىن ساتاتىن جەڭىلتەك قىزدارعا بارىپ، بودي ماسساج جاساتىپ، جىنىستىق قاتىناسقا تۇسەتىنىن ءدۇيىم جاماعات بىلەدى.
دىنىمىزدە تيىم سالىنعان تەمەكى، ناسىباي، اناشا دا شەگەدى.
ءوزى قۇددى ءبىر يمام ەمەس، تەاتردا قىزمەت جاسايتىن سايقىمازاق سەكىلدى ۇنەمى بىلاپىت-كورگەنسىز انەكدوتتار ايتادى.
ەممات عۇماروۆ 30-جىل بويى ەلدى سورلاتىپ، ءسالافيزمنىڭ قازاقستاندا تارالۋىنا مۇددەلى نۇرسۇلتان نازاربايەۆتى ۇنەمى ماداقتاۋىن توقتاتقان ەمەس.
«قۇرمەتتى وراز اعا! ءسىز ءداستۇرلى ءدىنىمىزدى جەمقور جانە امورالدى يمامداردان مەيلىنشە قورعاپ جۇرگەن قازاقستانداعى جالعىز ءجۋرناليستسىز، وسى جانايقايمىزدى ءدۇيىم حالىققا جاريالاۋىڭىزدى وتىنەمىز. قۇرمەتپەن: "قۇسپان مولدا" مەشىتىنىڭ ءبىر توپ جاماعاتى"، – دەلىنگەن حاتتا.