تۇتىنۋشىلىق نەسيەلەردىڭ جىلدىق مولشەرلەمەسى ازايادى

قۇجات 29 ناۋرىزعا دەيىن تالقىلاۋ ءۇشىن اشىق نقا سايتىندا جاريالاندى.

ق ر قارجى نارىعىن رەتتەۋ جانە دامىتۋ اگەنتتىگى جىلدىق ءتيىمدى سىياقى مولشەرلەمەسىنىڭ شەكتى مولشەرىنە وزگەرىستەر ەنگىزەتىن قاۋلى جوباسىن ازىرلەدى، دەپ حابارلايدى Almaty-akshamy.kz

اتاپ ايتقاندا، سىياقىنىڭ جىلدىق ءتيىمدى مولشەرلەمەسىنىڭ شەكتى مولشەرىن مىناداي شامادا بەكىتۋ كوزدەلگەن:

- ەكىنشى دەڭگەيدەگى بانكتەر، بانك وپەراسيالارىنىڭ جەكەلەگەن تۇرلەرىن جۇزەگە اسىراتىن ۇيىمدار بەرەتىن بانك قارىزدارى بويىنشا – كەپىلسىز بانك قارىزدارى بويىنشا 44%؛ كەپىلمەن قامتاماسىز ەتىلگەن بانك قارىزدارى بويىنشا 40 (قىرىق) پايىز؛ يپوتەكالىق تۇرعىن ءۇي قارىزدارى بويىنشا 25 (جيىرما بەس) پايىز؛

- ميكروقارجىلىق قىزمەتتى جۇزەگە اسىراتىن ۇيىمدار بەرەتىن ميكروكرەديتتەر بويىنشا – 44%.

بانك قارىزى شارتىن، ميكروكرەديت بەرۋ تۋرالى شارتتى جاساۋ، بانك قارىزىن بەرۋمەن جانە قىزمەت كورسەتۋمەن بايلانىستى بانك قارىزى، ميكروكرەديت بويىنشا سىياقى مولشەرلەمەسى وزگەرگەن جانە (نەمەسە) كوميسسيالار مەن وزگە تولەمدەر وزگەرگەن نەمەسە جاڭادان ەنگىزىلگەن كۇنى سىياقىنىڭ جىلدىق ءتيىمدى مولشەرلەمەسى وسى تارماقتا بەكىتىلگەن شەكتى مولشەردەن اسىپ كەتە المايدى.

تۇسىندىرمە قۇجاتتا قاۋلى جوباسى كەپىلسىز تۇتىنۋشىلىق كرەديتتەر ءۇشىن جىلدىق ءتيىمدى سىياقى مولشەرلەمەسىن 56%-دان 44%-عا دەيىن تومەندەتۋ ماقساتىندا ازىرلەنگەنى جازىلعان.