تۇرمىستا گازدى پايدالانۋ ەرەجەسىن ساقتاڭىز

سالا ماماندارى تۇتىنۋشىلاردى قاۋىپسىزدىك شارالارىن ساقتاۋعا شاقىردى.

تابيعي گاز ۇيىمىزگە جىلۋ مەن جايلىلىق سىيلايتىنى ءسوزسىز. ءبىراق، ونى ۇقىپتى ءارى جاۋاپكەرشىلىكپەن پايدالانۋ - بىزگە مىندەت.

الماتىدا كۇن كۇرت سۋىتىپ، اياز بولعان كەزدە، تابيعي گازبەن جۇمىس ىستەيتىن گاز جابدىقتارىن پايدالانۋ كەزىندە جازاتايىم وقيعالار جيىلەگەن. بۇل تۋرالى الەۋمەتتىك قىزمەتتەر ۇيىندە الماتى قالاسى كوممۋنالدىق ينفراقۇرىلىمدى دامىتۋ باسقارماسى ماماندارى، قالالىق تجد وكىلدەرى مەن سەرۆيستىك قىزمەت وكىلدەرىنىڭ قاتىسۋىمەن وتكەن كەڭەستە ايتىلدى.

«ءبىرىنشى كەزەكتە جاۋاپكەرشىلىك تۇتىنۋشىلاردىڭ وزدەرىندە بولۋى ءتيىس. ودان كەيىن سەرۆيستىك قىزمەتتەرگە جۇكتەلەدى. گاز جابدىعىن دۇرىس پايدالانباعانى ءۇشىن 30-دان 100 اەك-كە دەيىن ايىپپۇل تولەيدى. تۇتىنۋشىلار گاز اسپاپتارىنا بايلانىستى كىم قىزمەت كورسەتەتىنىن ءبىلىپ، جىلىنا ءبىر رەت تەكسەرۋ جۇرگىزۋى كەرەك»، – دەپ اتاپ ءوتتى الماتى قالاسى كوممۋنالدىق ينفراقۇرىلىمدى دامىتۋ باسقارماسى باسشىسىنىڭ ورىنباسارى نۇربول قاجين.

مامانداردىڭ ايتۋىنشا، جازاتايىم وقيعالاردىڭ ەداۋىر بولىگى قاۋىپسىزدىك ەرەجەلەرىن ساقتاماۋى سالدارىنان ورىن الادى.  

«جازاتايىم وقيعالاردىڭ باسىم بولىگى تۇتىنۋشىلاردىڭ سالعىرتتىعىنان ورىن الادى. سەبەبى، تۇرعىندار مۇرجالاردىڭ تازالىعىن (بىتەلۋدى) باقىلامايدى، مۇرجانى دۇرىس قوسپايدى، وسىنداي سەبەپتەردەن كەيىن ونىڭ تۇتاستىعى بۇزىلادى. سونىمەن قاتار، گاز اسپاپتارىندا گازدى سوندىرەتىن اۆتوماتيكانىڭ بولماۋى، ولاردى قاراۋسىز قالدىرۋ، تۇراقتى تەحنيكالىق قىزمەت كورسەتۋدى ەلەمەۋ سەكىلدى نەمقۇرايلى كوزقاراس تا كەيدە قايعىلى وقيعالارعا سەبەپ بولىپ جاتادى. تاعى ءبىر سەبەپ – تەحنيكالىق قىزمەت كورسەتۋ جۇمىستارىنىڭ ۋاقتىلى ورىندالماۋى، ياعني، قىزمەت كورسەتەتىن كومپانيالار كەستەگە سايكەس تەكسەرۋ جۇمىستارىن جۇرگىزۋ ءۇشىن مەكەنجايلارعا كىرە المايدى. مىنە، بۇل دا اپاتتى جاعدايلاردىڭ ورىن الۋىن تۋىنداتادى»، – دەيدى ينفراقۇرىلىمدى دامىتۋ باسقارماسىنىڭ ليفت، گاز جانە قازاندىق جابدىقتارىن باقىلاۋ ءبولىمىنىڭ باس مامانى دينارا جۋسانبەكوۆا.

باس ماماننىڭ ايتۋىنشا، گاز جابدىقتارىن، قازانداردى، باللونداردى جانە قىسىممەن جۇمىس ىستەيتىن ىدىستاردى الەۋمەتتىك ينفراقۇرىلىم وبەكتىلەرىندە پايدالانۋ قاۋىپسىزدىگى بويىنشا ايلىقتار ءجيى وتكىزىلىپ تۇرادى.

ەگەر ۇيىڭىزدە گازدىڭ ءيىسىن سەزسەڭىز، بىردەن تەرەزەلەر مەن ەسىكتەردى اشىپ، ءۇي-جايدى جەلدەتىڭىز. مۇنداي كەزدە ەلەكتر اسپاپتارى مەن جارىقتى قوسۋعا نەمەسە وشىرۋگە بولمايدى. دەرەۋ 104 تەلەفونىنا حابارلاسىپ، شۇعىل گاز قىزمەتىن شاقىرۋ قاجەت. ونى تەحنيكالىق قىزمەت كورسەتۋ بويىنشا سەرۆيستىك كومپانياعا قاتىستى باسقارۋ ورگانىنا (پيك، ميب، پت جانە ت.ب.) جۇگىنۋ ارقىلى نەمەسە تۇبىرتەكتەردە كورسەتىلگەن بايلانىس نومىرلەرى بويىنشا ناقتىلاۋعا بولادى. ال گازبەن جابدىقتاۋ جۇيەلەرى مەن گاز جابدىقتارى وبەكتىلەرىنىڭ قاۋىپسىزدىك تالاپتارىن بۇزۋ ماسەلەلەرى بويىنشا باسقارماعا (دوستىق داڭعىلى، 85، تەل.225-14-19) جازباشا حابارلاما قالدىرا الاسىز.  

باسقوسۋدان كەيىن سالا ماماندارى جەكەلەگەن ۇيلەردىڭ گاز قوندىرعىلارىن تەكسەرۋ بويىنشا رەيد جۇرگىزدى. رەيد بارىسىندا تۇرعىندارعا گاز قوندىرعىلارىن پايدالانۋ كەزىندە بارىنشا اباي بولۋعا، قانداي دا ءبىر ولقىلىق بايقاعان جاعدايدا دەرەۋ ارنايى سەرۆيستىك قىزمەت كورسەتەتىن ورتالىقتارعا حابارلاسۋعا كەڭەس بەردى. سونىمەن قاتار، گاز اسپاپتارىن پايدالانۋعا ارنالعان قاۋىپسىزدىك شارالارى تۋرالى ارنايى پاراقشالار تاراتتى.