2026 جىلدىڭ 20–29 قاڭتار ارالىعىندا الماتى قالاسى اۋماعىندا وتباسىلىق-تۇرمىستىق قاتىناستار سالاسىندا جاسالاتىن قۇقىق بۇزۋشىلىقتاردىڭ الدىن الۋ جانە جولىن كەسۋگە باعىتتالعان «تۇرمىس» اتتى قالالىق جەدەل-پروفيلاكتيكالىق ءىس-شاراسى وتكىزىلەدى.
ءىس-شارانىڭ نەگىزگى ماقساتى – تۇرمىستىق قىلمىستار دەڭگەيىن تومەندەتۋ، ازاماتتاردىڭ ءومىرى مەن دەنساۋلىعىن قورعاۋ، سونداي-اق وتباسىنداعى زورلىق-زومبىلىقتىڭ الدىن الۋ. جەدەل-پروفيلاكتيكالىق ءىس-شارا اياسىندا پوليسيا قىزمەتكەرلەرى پروفيلاكتيكالىق ەسەپتە تۇرعان تۇلعالاردى تەكسەرۋ، قولايسىز وتباسىلاردى ارالاۋ، سونداي-اق حالىق اراسىندا ءتۇسىندىرۋ جۇمىستارىن جۇرگىزۋ سياقتى كەشەندى پروفيلاكتيكالىق شارالاردى جۇزەگە اسىرادى.
الماتى قالاسى پوليسيا دەپارتامەنتى قوعامدىق قاۋىپسىزدىك باسقارماسىنىڭ وتباسىلىق-تۇرمىستىق زورلىق-زومبىلىققا قارسى كۇرەس ءبولىمىنىڭ باستىعى پوليسيا پودپولكوۆنيگى قانتاربايەۆا جادرا دجەلەۋوۆنا اتاپ وتكەندەي: «„تۇرمىس“ اتتى جەدەل-پروفيلاكتيكالىق ءىس-شاراسىن وتكىزۋ، ەڭ الدىمەن، وتباسىلىق-تۇرمىستىق جانجالداردىڭ اۋىر سالدارىنىڭ الدىن الۋعا باعىتتالعان. ءبىزدىڭ باستى مىندەتىمىز – پروبلەمالىق جاعدايلاردى دەر كەزىندە انىقتاۋ، جابىرلەنۋشىلەرگە كومەك كورسەتۋ جانە تۇرمىستىق سالادا قۇقىققا قارسى ارەكەتتەرگە جول بەرەتىن تۇلعالارعا قاتىستى ءتيىستى شارالار قابىلداۋ».
ءىس-شارا بارىسىندا پروفيلاكتيكا ورگاندارىمەن، الەۋمەتتىك قورعاۋ جانە جەرگىلىكتى ءوزىن-وزى باسقارۋ ورگاندارىمەن ءوزارا ءىس-قيمىلعا، سونداي-اق ازاماتتاردىڭ حابارلامالارىنا جەدەل دەن قويۋعا ەرەكشە نازار اۋدارىلادى. قۇقىق قورعاۋ ورگاندارى ءوڭىر تۇرعىندارىن بەيجاي قاراماۋعا جانە وتباسىلىق-تۇرمىستىق زورلىق-زومبىلىق فاكتىلەرى نەمەسە ونىڭ جاسالۋ ءقاۋپى تۋرالى پوليسيا ورگاندارىنا ۋاقتىلى حابارلاۋعا شاقىرادى.