سەرىك كۇدەبايەۆتىڭ تۇرمەدەگى سۋرەتىنە بايلانىستى تەرگەۋ جۇرگىزىلەدى
اتالعان سۋرەتكە قاتىستى قىلمىستىق اتقارۋ جۇيەسى كوميتەتىنىڭ باسپا ءسوز قىزمەتى تۇسىنىكتەمە بەردى.
"قازىرگى تاڭدا سوتتالعانداردىڭ ۇيالى تەلەفوندى قولدانۋ جانە بەينەباقىلاۋ كامەراسىنىڭ وبەكتيۆىن بۇركەمەلەۋ فاكتىسى بويىنشا قىزمەتتىك تەرگەۋ تاعايىندالدى. قىلمىستىق اتقارۋ جۇيەسى كوميتەتى جەكە قۇرامنىڭ زاڭدىلىقتى بۇزۋ ماسەلەسىنە قاتىستى تۇبەگەيلى ۇستانىمعا بەرىك. كەلىپ تۇسكەن ءار اقپارات تىڭعىلىقتى تەكسەرىلەدى. زاڭبۇزۋشىلىق ناقتىلانعان جاعدايدا قولدانىستاعى زاڭناما اياسىندا شارا قولدانىلادى"، دەلىنگەن كوميتەتتىڭ رەسمي مالىمەتىندە.
سونداي-اق سەرىك كۇدەبايەۆ پەن باسقالار جايعاسقان داستارحان ۇستىندە تارتىپكە قايشى كەلەتىن ازىق-تۇلىك ءونىمى جوق ەكەنى دە ناقتىلانادى.
"ءىىم بۇيرىعىمەن بەكىتىلگەن ىشكى ءتارتىپ ەرەجەلەرى بويىنشا قىلمىستىق اتقارۋ جۇيەسىنە قاراستى مەكەمەدەگى سوتتالعاندار سىرتتان سالەمدەمە رەتىندە نەمەسە تۋىسقاندارىمەن كەزدەسكەن كەزدە ازىق-تۇلىك قابىلداۋعا قۇقىلى. سونداي-اق ولار ارنايى بولىنگەن ورىندا بوس ۋاقىتتارىندا ۇيدەن كەلگەن تاماقتى تۇتىنا الادى. بۇل تالاپ قىلمىستىق اتقارۋ جۇيەسىندەگى مەكەمەلەردىڭ بارلىق تۇرىنە ورتاق. الدىن الا مالىمەت بويىنشا، شىعىس قازاقستان وبلىستىق قىلمىستىق اتقارۋ جۇيەسى دەپارتامەنتىنىڭ №22 مەكەمەسىندە سوتتالعاندار تۋىسقاندارىنان دايىن تاماق قابىلداپ العان. تەكسەرۋ كەزىندە تىيىم سالىنعان ازىق-تۇلىك ونىمدەرى (الكوگول ونىمدەرى) تابىلعان جوق"، - دەلىنگەن كوميتەتتىڭ باسپا ءسوز قىزمەتىنىڭ حابارلاماسىندا.