قازاقستاننىڭ قىلمىستىق اتقارۋ جۇيەسى مەكەمەلەرىندە ءقازىر كامەلەتكە تولماعان 75 بالا جازاسىن وتەپ جاتىر.
الدىن الا ەسەپتەۋلەر بويىنشا سولاردىڭ تورتەۋى راقىمشىلىق اياسىندا بوستاندىققا شىعادى، دەپ حابارلايدى aqshamnews.kz.
بۇگىن ءماجىلىس دەپۋتاتتارى «قازاقستان رەسپۋبليكاسى كونستيتۋسياسىنىڭ وتىز جىلدىعىنا بايلانىستى راقىمشىلىق جاساۋ تۋرالى» زاڭ جوباسىن قاراپ جاتىر. قۇجاتتى تالقىلاۋ بارىسىندا دەپۋتاتتار ىشكى ىستەر مينيسترلىگىنەن نەشە بالا راقىمشىلىقپەن بوساپ شىعاتىنىن سۇرادى.
«ءقازىر كامەلەتكە تولماعان سوتتالعانداردى ۇستاۋ ورىندارىندا 75 بالا جازاسىن وتەپ جاتىر. ونىڭ 70ء-سى – ۇل بالا، ولار الماتى قالاسىنداعى №11 مەكەمەدە جازاسىن وتەپ جاتىر، ال 5 قىز بالا الماتى وبلىسىنداعى جاۋعاشتى كەنتىندەگى تۇرمەدە وتىر. وسى سوتتالعانداردىڭ ىشىندە 4 ءجاسوسپىرىم الدىن الا ەسەپتەۋلەر بويىنشا راقىمشىلىققا ىلىگەدى، مەرزىمدەرى قىسقارتىلادى»، - دەپ جاۋاپ بەردى ىشكى ىستەر ءمينيسترىنىڭ ورىنباسارى اباي قايىربەكوۆ.
قايىربەكوۆتىڭ ايتۋىنشا، بۇرىن راقىمشىلىققا ىلىگىپ، كەيىن قايتا قىلمىس جاساپ6 سوتتالعانداردىڭ سانى ءقازىر 2 مىڭنان اسادى.
«ءبىز ولاردى ىرىكتەپ قارادىق. ولاردىڭ اراسىندا وسى راقىمشىلىق زاڭىنا ىلىگەتىن 30-دان استام ادام بار»، - دەيدى ءىىم باسشىسىنىڭ ورىنباسارى.