بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسى كونستيتۋسياسىنىڭ وتىز جىلدىعىنا بايلانىستى راقىمشىلىق جاساۋ تۋرالى» زاڭى قابىلداندى.
قۇجاتتى پارلامەنتتىڭ ءبىر توپ دەپۋتاتى ازىرلەدى، دەپ حابارلايدى aqshamnews.kz.
زاڭدا ازاماتتار مەن مەملەكەتتىڭ قاۋىپسىزدىگىنە ايتارلىقتاي قاتەر توندىرمەيتىن قىلمىستار جاساعانى ءۇشىن سوتتالعانداردى بوساتۋ، اتاپ ايتقاندا:
قىلمىستىق تەرىس قىلىقتار مەن ونشا اۋىر ەمەس قىلمىستار جاساعانداردى،
زالال كەلتىرۋگە الىپ كەلمەگەن نەمەسە ونى تولىق وتەگەن اۋىرلىعى ورتاشا قىلمىستار جاساعان ادامداردى،
زالالدىڭ نەمەسە ازاماتتىق تالاپ قويۋدىڭ بار-جوعىنا قاراماستان، اۋىرلىعى ورتاشا قىلمىس جاساعان الەۋمەتتىك جاعىنان وسال ادامداردى بوساتۋ ەسكەرىلگەن.
سونىمەن قاتار، ونشا اۋىر ەمەس جانە اۋىرلىعى ورتاشا قىلمىستار ءۇشىن قىلمىستىق جاۋاپتىلىققا تارتىلاتىن ادامدار وسى زاڭ جوباسى قولدانىسقا ەنگىزىلگەنگە دەيىن جاساعان قىلمىستار تۋرالى قىلمىستىق ىستەردى، ونىڭ ىشىندە سوتتاردا قارالماعان قىلمىستىق ىستەردى توقتاتۋ قاراستىرىلعان. بۇدان بولەك، اۋىر جانە اسا اۋىر قىلمىستار ءۇشىن جازانىڭ وتەلمەگەن مەرزىمىن قىسقارتۋ كوزدەلگەن.
- قىلمىستىق كودەكستىڭ 78-بابىنا سايكەس، زاڭ جوباسى اسا ءقاۋىپتى قىلمىس جاساعان ادامدارعا قولدانىلمايدى... بۇدان باسقا، زاڭ جوباسى قىلمىستىق جاۋاپكەرشىلىكتەن بوساتۋدى جانە سوتقا دەيىنگى تەرگەۋ ورگاندارىنىڭ وندىرىسىندەگى 2136 قىلمىستىق ءىس بويىنشا ءىس جۇرگىزۋدى توقتاتۋدى ايقىندايتىن نورمالاردى قامتيدى. ولار بويىنشا 1 773 ادام تەرگەۋ ورگاندارىنىڭ شەشىمى بويىنشا قىلمىستىق جاۋاپكەرشىلىكتەن بوساتىلادى، ونىڭ ىشىندە 99-ى تەرگەۋ يزولياتورلارىندا، ال 1 674 ادام بويىنشا سوتتار ۇكىم تاعايىنداۋ كەزىندە جازا مەرزىمىن قىسقارتۋ جانە بوساتۋ تۋرالى زاڭ جوباسىنىڭ ەرەجەلەرىن قولدانۋ كوزدەلگەن. سونداي-اق مۇددەلى مەملەكەتتىك ورگاندارمەن بىرلەسىپ، راقىمشىلىق جاساماۋ ۇسىنىلاتىن قىلمىستاردىڭ تىزبەسى ايقىندالدى (جوبانىڭ 5-بابى). قىلمىستىق ءىس جۇرگىزۋ كودەكسىنىڭ 476-بابىنىڭ 15-تارماعىنا سايكەس، راقىمشىلىق جاساۋدى قولدانۋ تۋرالى تۇپكىلىكتى شەشىمدى سوت ءاربىر سوتتالۋشىعا قاتىستى جەكە قابىلدايدى، - دەدى ءماجىلىس دەپۋتاتى ابزال قۇسپان.
بۇدان باسقا، زاڭ جوباسىمەن جەرگىلىكتى اتقارۋشى ورگاندارعا باس بوستاندىعىنان ايىرۋ ورىندارىنان بوساتىلاتىن ادامداردى الەۋمەتتىك بەيىمدەۋ جانە قايتا الەۋمەتتەندىرۋ جونىندەگى مىندەتتەر جۇكتەلەدى.
- قازىرگى ۋاقىتتىڭ شىندىعىن ەسكەرە وتىرىپ، راقىمشىلىق جاساۋ مەملەكەتتىك شىعىستاردى وڭتايلاندىرۋعا (جىلىنا شامامەن 5 ملرد. تەڭگە) جانە جۇكتەمەنى ازايتۋ ەسەبىنەن قاج مەكەمەلەرىندە سوتتالعانداردى ۇستاۋ جاعدايلارىن جاقسارتۋعا مۇمكىندىك بەرەدى. زاڭ جوباسىن قابىلداۋ ناتيجەسىندە ۇنەمدەلگەن بيۋدجەت قاراجاتىن قاج-دى قارجىلاندىرۋعا جانە حالىقارالىق-قۇقىقتىق ستاندارتتاردى ەنگىزۋگە، ونىڭ ىشىندە كامەرالىق تۇرمەلەرگە كوشۋگە باعىتتاۋ مۇمكىن بولادى، - دەدى دەپۋتات.