«تۇركسوي» ۇيىمى تۇركى مادەنيەتىنىڭ قايراتكەرلەرىن ماراپاتتادى

«اباي قۇنانباي ۇلى»، «نيزامي گياندجيەۆي»، «شىڭعىس ايتماتوۆ» جانە «حالدۋن تانەر»، «توقتوعۇل ساتىلعان» اتىنداعى التىن مەدالدار، سونداي-اق ەستەلىك تاباقشالار تۇركىتىلدەس مەملەكەتتەردىڭ دوستىعىن نىعايتۋعا ەڭبەگى سىڭگەن ارتىستەرگە تابىس ەتىلدى.

سالتاناتتى شارا تۇركى الەمى ءۇشىن ورتاق ناۋرىز مەرەكەسى قارساڭىندا ۇيىمداستىرىلدى، دەپ حابارلايدى Almaty-akshamy.kz 

«ارينە، ءبىزدىڭ جاساعان جۇمىسىمىز مەملەكەتتەرىمىز اراسىنداعى دوستىعىمىزدى نىعايتادى. ونىڭ كەلەشەگى مول دەپ ويلايمىن. وزبەكستان، ءازىربايجان، امەريكا، ءتىپتى جاپونيادا كونسەرت بەردىك. ءار كونسەرتتىڭ وزىندىك ءىزى بار. وسىنداي تۇركىتىلدەس ۇيىم، مەملەكەتتەر مەن ولاردىڭ مادەني مۇرالارى حالىقتىڭ ەسىندە قالادى. ءبىز دە «تۇركسوي» وركەسترىنىڭ قۇرامىندا جۇرگەنىمىزگە وتە قۋانىشتىمىز. الدا ءالى تالاي جوسپارىمىز بەن تىڭ شىعارمالارىمىز بار»، - دەيدى «سازگەن سازى» فولكلورلىق-ەنوگرافيالىق ءانسامبلىنىڭ كوركەمدىك جەتەكشىسى /قازاقستان/ باعدات تىلەگەنوۆ.

«وسى ءساتتى پايدالا وتىرىپ، دۇيسەن قوراباي ۇلى باستاعان حالىقارالىق تۇركسوي ۇيىمىنا ماراپاتپەن ەلەپ-ەسكەرىپ جاتقاندىعى ءۇشىن العىس ايتقىم كەلەدى. شاقىرتۋ، سىي-قۇرمەت پەن ماراپاتتارىڭىز ءۇشىن كوپ راقمەت! مەن ءۇشىن كۇتپەگەن توسىنسىي بولدى»، - دەدى «حورەزم» مۋزىكالىق دراما تەاترىنىڭ ديرەكتورى /وزبەكستان/ دينارا يبراگيموۆا.

ايتا كەتەيىك، قازىرگى تاڭدا تۇركسوي ۇيىمى 350-گە تارتا تۇركىتىلدەس ەل ونەرپازدارىنىڭ باسىن قوسىپ، ناۋرىز مەرەكەسىنە ارناپ ەكى اپتالىق باعدارلاما ازىرلەگەن. اۋقىمدى شارا 2022 جىلدىڭ مادەني استاناسى دەپ تانىلعان بۋرسا قالاسىندا وسى ايدىڭ سوڭىندا قورىتىندىلانباق.