اۋەجاي الاڭىنداعى فونتان، مولداعالييەۆ كوشەسىندەگى جاياۋ جۇرگىنشىلەر جولى جانە وقۋشىلار ءۇيىنىڭ جانىنداعى ساياباق
وكق بريفينگىندە تۇركسىب اۋدانىنىڭ اكىمى باقىتجان اقجاروۆ اۋداندى اباتتاندىرۋ جانە قولايلى ورتا قۇرۋ جۇمىستارى تۋرالى باياندادى. ءبىرقاتار نىساندار «حالىق قاتىساتىن بيۋدجەت» باعدارلاماسى بويىنشا جۇزەگە اسىرىلۋدا.
«اۋداندى اباتتاندىرۋ اياسىندا بيىل مولداعالييەۆ پەن چەحوۆ كوشەلەرىنىڭ بويىندا جاياۋ جۇرگىنشىلەر جانە سەرۋەندەۋ ايماعى اياقتالىپ، №6 وقۋشىلار ءۇيىنىڭ جانىنداعى ساياباق قايتا جاڭارتىلدى. بۇل جوبالار ساۋرانبايەۆ كوشەسىنىڭ بويىندا بۇرىن جاسالعان سەرۋەندەۋ ايماعىنىڭ جالعاسى بولدى»، - دەدى اۋدان اكىمى ب.اقجاروۆ.
سونىمەن قاتار، اۋەجاي الاڭىنا فونتان جانە سۋارۋ جۇيەسى ورناتىلىپ، جاياۋ جۇرگىنشىلەرگە ارنالعان جولدار جاڭارتىلدى. سونداي-اق، ەكولوگيا جانە قورشاعان ورتانى قورعاۋ دەپارتامەنتىمەن اباتتاندىرۋ بويىنشا مىنانداي جوبالىق-سمەتالىق قۇجاتتاما ازىرلەنۋدە:
- سكانديناۆيالىق جۇرۋگە ارنالعان ەكو-جولدارى بار "باۋم" توعايىن اباتتاندىرۋ، شاعىن ارحيتەكتۋرالىق پىشىندەردى ورناتۋ؛
- "ۇلكەن الماتى" كانالىنا رەكرەاسيالىق جانە جاعاجاي ايماقتارىن جايلاستىرا وتىرىپ جاياۋ جۇرگىنشىلەر كوپىرلەرىن جاڭارتۋ؛
- "كىشى الماتى" وزەنىنىڭ بويىنداعى جاياۋ جۇرگىنشىلەر-سەرۋەندەۋ ايماعىن اباتتاندىرۋ.
جوبالاردى ىسكە اسىرۋ 2024 جىلدىڭ ەكىنشى توقسانىندا باستالادى.
«تۇركسىب اۋدانى 688 مىڭنان استام اعاشى بار قالانىڭ ەڭ جاسىل اۋداندارىنىڭ ءبىرى بولىپ سانالادى. جىل سايىن اۋماقتى كوگالداندىرۋ بويىنشا اۋقىمدى جۇمىستار جۇرگىزىلۋدە. تەك 2020-2022 جىلدار ارالىعىندا 12 مىڭ جاس اعاش وتىرعىزىلدى، وسى جىلدىڭ كۇزىندە تاعى 28 مىڭ اعاش وتىرعىزۋ جوسپارلانۋدا»، - دەپ ءبولىستى اۋدان اكىمى.
اۋداندا 12 مىڭعا جۋىق اپاتتى اعاش بولسا، ونىڭ ىشىندە بيىل 2،5 مىڭى كەسىلەدى. اۋدان اكىمدىگى الداعى 5 جىلدا بارلىق اپاتتى اعاشتاردان تولىقتاي قۇتىلۋدى جوسپارلاپ وتىر.
ب.اقجاروۆ ءوز سوزىندە اۋداندا «حالىق قاتىساتىن بيۋدجەت» باعدارلاماسى قارقىندى جۇزەگە اسىرىلىپ جاتقانىن دا اتاپ ءوتتى.
«بيىل باعدارلامانىڭ تيىمدىلىگىن ەسكەرە وتىرىپ، 78 جوبانى جۇزەگە اسىرۋ ءۇشىن تۇركسىب اۋدانى ءۇشىن بولىنگەن قاراجات سوماسى 1،7 ملرد تەڭگەگە دەيىن ۇلعايتىلدى»، - دەدى ول.
بۇگىنگى تاڭدا 65 جوبا اياقتالدى، ونىڭ 33ء-ى اۋلالاردى جارىقتاندىرۋ بويىنشا؛ 20 - بالالار ويىن الاڭدارىن سالۋعا؛ 11 - تەرەڭدەتىلگەن قوقىس كونتەينەرلەرىن ورناتۋعا؛ 14 - جاياۋ جۇرگىنشىلەر كوپىرلەرىن جوندەۋگە ارنالعان. 2023 جىلدىڭ 20 جەلتوقسانىنا دەيىن تاعى 13 جوبا اياقتالادى دەپ كۇتىلۋدە.