قازاقستان PISA-2022 حالىقارالىق زەرتتەۋىنىڭ قورىتىندىسى بويىنشا ماتەماتيكا جانە جاراتىلىستانۋ عىلىمدارىنان توپ 50 ەلدىڭ قاتارىنا ەندى، دەپ حابارلايدى اlmaty-akshamy.kz ق ر ءبىلىم مينيسترلىگىنە سىلتەمە جاساپ. ەلىمىزدىڭ ءبىلىم رەيتينگىن ارتتىرۋعا الماتى قالاسى ۇلكەن ۇلەس قوسقانى قۋانتادى.
PISA زەرتتەۋىنىڭ جاھاندىق رەيتينگى - ءبىلىم ساپاسىن باعالاۋدىڭ ماڭىزدى حالىقارالىق جۇيەلەرىنىڭ ءبىرى. ق ر ءبىلىم مينيسترلىگىنىڭ مالىمەتىنشە، وقۋشىلار 81 ەلدىڭ ىشىندە ماتەماتيكادان 46 ورىن، وقۋدان 61 ورىن، جاراتىلىستانۋ ءپانى بويىنشا 49 ورىندى يەلەندى.
بۇل رەتتە، الماتى قالاسى وقۋشىلارىنىڭ بارلىق ۇلتتىق جانە حالىقارالىق رەيتينگتەر بويىنشا كورسەتكىشتەرى ەلىمىزدىڭ باسقا وڭىرلەرىمەن سالىستىرعاندا تۇراقتى جوعارى بولىپ قالۋدا. PISA-2022 زەرتتەۋىنىڭ ناتيجەلەرى بويىنشا ەل بولىنىسىندە الماتى قالاسى «ماتەماتيكالىق ساۋاتتىلىق» جانە «جاراتىلىستانۋ ساۋاتتىلىعى» باعىتتارى بويىنشا ءبىرىنشى ورىنعا يە بولدى.
ماسەلەن، ماتەماتيكالىق ساۋاتتىلىق بويىنشا الماتى قالاسىنىڭ ورتاشا بالى– 453 قۇرادى، بۇل ەل بويىنشا ورتاشا باللدان (425 بالل) جوعارى.
عىلىمي-جاراتىلىستانۋ ساۋاتتىلىعى بويىنشا الماتى قالاسىنىڭ ورتاشا بالى – 458، ەل بويىنشا ورتاشا باللدان (423 بالل) اسىپ ءتۇستى.
سونىمەن قاتار، وقۋ ساۋاتتىلىعى سالاسىندا الماتىنىڭ ورتاشا بالى 423ء-تى قۇرادى، بۇل ەل بويىنشا ورتاشا بالدان دا جوعارى (386 بالل). وقۋ ساۋاتتىلىعى بويىنشا الماتى قالاسى ەل بويىنشا جالپى رەيتينگتە 3 ورىنعا يە بولدى.
قورىتا كەلە، الماتى PISA-2022 حالىقارالىق زەرتتەۋىنىڭ ماتەماتيكالىق جانە جاراتىلىستانۋ ساۋاتتىلىعى باعىتتارى بويىنشا كوشباسشى ورىنعا يە بولىپ، قالامىزدىڭ ءبىلىم بەرۋ جۇيەسىنىڭ ۇلكەن جەتىستىگىن كورسەتەدى.
