تۇركىتىلدەس ەلدەردىڭ مەكتەپ باعدارلامالارىنا ورتاق پاندەر ەنگىزىلمەك

حاتتاماعا حالىقارالىق تۇركى اكادەمياسىنا مۇشە مەملەكەتتەر، ياعني تۇركيا، ءازىربايجان، قازاقستان جانە قىرعىزستان تاراپتارى قول قويدى. 

باۋىرلاس ەلدەردىڭ ءبىلىم بەرۋ سالاسىنداعى ىنتىماقتاستىقتى ارتتىرۋعا باعىتتالعان وقۋلىقتار تۇركىتىلدەس مەملەكەتتەردىڭ باسشىلارىنىڭ سامميتىندە بەرىلگەن تاپسىرما بويىنشا ازىرلەندى، دەپ حابارلايدى Almaty-akshamy.kz.

نۇر-سۇلتان قالاسىندا حالىقارالىق تۇركى اكادەمياسىنىڭ عىلىمي كەڭەسى مەكتەپ باعدارلاماسىنا «ورتاق تۇركى تاريحى»، «ورتاق تۇركى ادەبيەتى»، «تۇركى الەمىنىڭ گەوگرافياسى» وقۋلىقتارىن ەنگىزۋ تۋرالى شەشىم قابىلدادى.

باۋىرلاس ەلدەردىڭ ءبىلىم بەرۋ سالاسىنداعى ىنتىماقتاستىقتى ارتتىرۋعا باعىتتالعان وقۋلىقتار تۇركىتىلدەس مەملەكەتتەردىڭ باسشىلارىنىڭ سامميتىندە بەرىلگەن تاپسىرما بويىنشا ازىرلەندى. 

2021 جىلى ىستانبۇلدا وتكەن عىلىمي كەڭەستىڭ 4-وتىرىسىندا تۇركيا باستاماسى بويىنشا ساراپشىلار كەزدەسۋ وتكىزگەن بولاتىن. ناتيجەسىندە ولار «ورتاق تۇركى تاريحى»، «ورتاق تۇركى ادەبيەتى» جانە «تۇركى الەمىنىڭ گەوگرافياسى» وقۋلىقتارىنىڭ ماتىندەرىن ماقۇلدادى. 

XV عاسىرعا دەيىنگى تۇركى حالىقتارىنىڭ تاريحى جازىلعان «ورتاق تۇركى تاريحى» وقۋلىعى 7 بولىمنەن تۇرادى. وندا تۇركى حالىقتارىنىڭ تاريحى ەگجەي-تەگجەيلى باياندالعان.

«تۇركى الەمىنىڭ گەوگرافياسى» وقۋلىعىنىڭ مازمۇنى جالپى تۇركى الەمىنىڭ گەوگرافيالىق بەينەسىن قالىپتاستىرۋعا، تۇركىلەردىڭ گەوگرافيالىق تۇسىنىكتەرى مەن يدەيالارىن زەردەلەۋگە، سونداي-اق تاۋەلسىز تۇركى ەلدەرىنىڭ گەوگرافياسىن زەرتتەۋگە باعىتتالعان.
«ورتاق تۇركى ادەبيەتى» وقۋلىعىندا وقۋشىلارعا ۇلتتىق ادەبيەت تاريحى نەگىزىندە ورتاق تۇركى ادەبيەتى مەن ورتاق مادەني قۇندىلىقتار تۋرالى جازىلعان. 

عىلىمي كەڭەستە قابىلدانعان قورىتىندى حاتتاماعا سايكەس تاراپتار ورتاق وقۋلىقتاردىڭ باعدارلامالارى مەن ماتىندەرىن بەكىتەدى، ءوز ەلدەرىندەگى ورتا ءبىلىم بەرۋ مەكەمەلەرىندە «ورتاق تۇركى تاريحى»، «ورتاق تۇركى ادەبيەتى» جانە «تۇركى الەمىنىڭ گەوگرافياسى» پاندەرىنىڭ ەنگىزىلۋىن قامتاماسىز ەتۋ جانە وقۋشىلار اراسىندا ولاردى تانىمال ەتۋ ءۇشىن ءتۇرلى ءىس-شارالار ۇيىمداستىرماق.