ۇلتتىق ۇلاننىڭ تۇركىستان قالاسىندا ورنالاسقان 5574 اسكەري بولىمىندە وتكەن اسكەري انت قابىلداۋ ءراسىمى ەرەكشە ءارى ەستە قالارلىق ساتتەرگە تولى بولدى، - دەپ حابارلايدى Aqshamnews.kz.
سالتاناتتى شارا بارىسىندا 100-گە جۋىق جاس سارباز وتان الدىنداعى قاسيەتتى بورىشىنا ادال بولۋعا انت بەردى.
راسىمگە ساربازداردىڭ 250-دەن اسا اتا-اناسى مەن جاقىندارى ارنايى كەلىپ، ۇلدارىنىڭ العاشقى اسكەري قادامىنا كۋا بولدى. بۇل ءوز كەزەگىندە جاس جاۋىنگەرلەرگە رۋحاني قولداۋ كورسەتىپ، سالتاناتتى شارانىڭ ماڭىزىن ارتتىرا ءتۇستى.
ءراسىمنىڭ ەڭ اسەرلى ساتتەرىنىڭ ءبىرى — قاتارداعى سارباز دامير نۇرلان ۇلىنىڭ كوپشىلىكتىڭ الدىندا سۇيىكتىسىنە ءسوز سالۋى بولدى. اسكەري ساپ تۇزەگەن الاڭدا ورىن العان بۇل ەرەكشە وقيعا جينالعان قاۋىمعا زور ەموسيا سىيلاپ، ەلگە قىزمەت ەتۋ مەن ادامدىق سەزىمنىڭ بىر-بىرىمەن ۇيلەسىم تاپقانىن كورسەتتى.
سالتاناتتى شارا بارىسىندا اسكەري ءبولىم كومانديرى، پولكوۆنيك تولەگەن شىنىبەكوۆ جاس ساربازداردى اسكەري انت قابىلداۋىمەن قۇتتىقتاپ، ولارعا جۇرەكجاردى تىلەگىن ءبىلدىردى:
«بۇگىن سىزدەر وتان الدىنداعى ازاماتتىق ءارى اسكەري جاۋاپكەرشىلىكتى سانالى تۇردە قابىلداپ وتىرسىزدار. اسكەري انت — بۇل ەرلىككە، تارتىپكە جانە ەلگە ادال قىزمەت ەتۋگە بەرىلگەن سەرت. سىزدەرگە زور دەنساۋلىق، قاجىماس قايرات، تەمىردەي ءتارتىپ پەن جاۋىنگەرلىك رۋح تىلەيمىن. ءاردايىم ەل سەنىمىن اقتاپ، ۇلتتىق ۇلاننىڭ ابىرويىن اسقاقتاتا بەرىڭىزدەر!» — دەدى ءبولىم كومانديرى.
وسى كۇننەن باستاپ قاتارداعى دامير نۇرلان ۇلى جانە ونىڭ قارۋلاس سەرىكتەرى تۇركىستان قالاسىنىڭ كوشەلەرى مەن ماڭىزدى قوعامدىق ءىس-شارالار كەزىندە جاۋىنگەرلىك قىزمەت اتقارۋعا كىرىسەدى. ولار قوعامدىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋ جولىندا جاۋىنگەرلىك مىندەت اتقارماق.
ايتا كەتەيىك، مۇنداي سالتاناتتى راسىمدەر جاس ساربازداردىڭ اسكەري رۋحىن كوتەرىپ، پاتريوتتىق سەزىمىن نىعايتا تۇسۋگە، سونداي-اق اتا-انا مەن اسكەر اراسىنداعى بايلانىستى بەكەمدەۋگە ىقپال ەتەدى.