تۇركىستاندا حالىقارالىق پوشتا الماسۋ ورنى اشىلدى

اپتاسىنا 60 تونناعا دەيىن پوشتا جونەلتىلمەك.

قازاقستان رەسپۋبليكاسىنىڭ حالىقارالىق ترانزيتتىك الەۋەتىن دامىتۋ ماقساتىندا بۇگىن «قازپوشتا» دۇنيەجۇزىلىك پوشتا وداعىنىڭ جۇيەسىندە تىركەلگەن ترانزيتتىك حالىقارالىق پوشتا جونەلتىلىمدەرىن وڭدەۋدى جۇزەگە اسىراتىن تۇركىستان قالاسىندا حالىقارالىق پوشتا الماسۋ – «تۇركىستان» حپاو ورنىن اشتى، دەپ حابارلايدى Almaty-akshamy.kz

گونكونگ پەن رەسەي فەدەراسياسىنىڭ تاعايىندالعان وپەراتورلارىمەن كوپجىلدىق ىنتىماقتاستىقتى ەسكەرە وتىرىپ، «تۇركىستان» حپاو ارقىلى پوشتا جونەلتىلىمدەرىنىڭ قوسىمشا ترانزيتتىك لوگيستيكاسىن قامتاماسىز ەتۋ جوسپارلانىپ وتىر.

وسى جوبا اياسىندا كومپانيا قازاقستاندىق لوگيستيكالىق كومپانياسى –«Alpha Sky» جشس-مەن حالىقارالىق ترانزيتتىك پوشتا جانە جۇك جونەلتىلىمدەرىن تاسىمالداۋ تۋرالى مەموراندۋمعا قول قويدى.

پوشتا جونەلتىلىمدەرىنىڭ جوسپارلانعان كولەمى  – اپتاسىنا 60 تونناعا دەيىن.

«قازپوشتا» اكسيونەرلىك قوعامى – قازاقستان رەسپۋبليكاسىنىڭ ۇلتتىق پوشتا وپەراتورى ءوز قىزمەتىن دۇنيەجۇزىلىك پوشتا وداعىنىڭ اكتىلەرىنە، كەدەن وداعىنىڭ كەدەن كودەكسىنە، «قازاقستان رەسپۋبليكاسىنداعى كەدەن ءىسى تۋرالى» ق ر كودەكسىنە، «پوشتا تۋرالى» ق ر زاڭىنا سايكەس حالىقارالىق پوشتا بايلانىسى قىزمەتتەرىن ۇسىنا وتىرىپ جۇزەگە اسىرادى.