تۇركىستاندا ديماش قۇدايبەرگەننىڭ حالىقارالىق شوۋى ءتۇسىرىلىپ جاتىر

تۇركىستان وبلىسىندا ديماش قۇدايبەرگەن اتقارۋشى پروديۋسەرلىك ەتەتىن Voice Beyond Horizon حالىقارالىق مۋزىكالىق شوۋىنىڭ ءتۇسىرىلىمى باستالدى.

 جوباعا قازاقستان، قىرعىز رەسپۋبليكاسى، جۇڭگو، يتاليا، مالايزيا جانە سەربيا ەلدەرىنىڭ انشىلەرى قاتىسۋدا، - دەپ حابارلايدى Aqshamnews.kz.

قاتىسۋشىلار تۇركىستان قالاسىنا پويىزبەن كەلدى. ءتۇسىرىلىم بارىسىندا ولار ءوڭىردىڭ باستى تۋريستىك جانە مادەني نىساندارىندا بولادى. اتاپ ايتقاندا، قوجا احمەت ياساۋي كەسەنەسى ورنالاسقان «ازىرەت سۇلتان» مەملەكەتتىك تاريحي-مادەني قورىق-مۋزەيىندە، كونە وتىرار قالاشىعىندا، Karavansaray تۋريستىك كەشەنىندە جانە ەتنواۋىلدا ءتۇسىرىلىم جۇمىستارىن جۇرگىزەدى.

بايقاۋ قاتىسۋشىلارىنىڭ ونەرىن ارنايى شاقىرىلعان حالىقارالىق ساراپشىلار باعالايدى.

تۇركىستانداعى ءتۇسىرىلىم اياقتالعان سوڭ جوبا شىعارماشىلىق ساپارىن ەلىمىزدىڭ باسقا وڭىرلەرىندە جالعاستىرادى. حالىقارالىق شوۋ ماڭعىستاۋ، الماتى جانە اقمولا وبلىستارىندا، سونداي-اق الماتى مەن استانا قالالارىندا وتەدى. جوبانىڭ فينالدىق كەزەڭى ەلوردادا ۇيىمداستىرىلماق.

ايتا كەتەيىك، Voice Beyond Horizon جوباسىن ديماش قۇدايبەرگەن قىتايدىڭ Hunan Broadcasting System تەلەارناسىمەن بىرلەسە جۇزەگە اسىرۋدا. اتالعان تەلەارنا مەن ونىڭ Mango TV سيفرلىق پلاتفورماسىن كۇنىنە 210 ميلليوننان استام كورەرمەن تاماشالايدى. وسى ارقىلى الەمدىك اۋديتوريا قازاقستاننىڭ تۋريستىك الەۋەتىمەن تانىسۋعا مۇمكىندىك الادى.

جوبا قازاقستان رەسپۋبليكاسىنىڭ تۋريزم جانە سپورت مينيسترلىگى، مادەنيەت جانە اقپارات مينيسترلىگى، Kazakh Tourism ۇلتتىق كومپانياسى مەن جەرگىلىكتى اتقارۋشى ورگانداردىڭ قولداۋىنا يە.