قازاقستان، قىرعىزستان جانە رەسەي ىشكى ىستەر مينيسترلىكتەرىنىڭ كيبەرپوليسياسى بىرلەسكەن وپەراسيا جۇرگىزىپ، تمد ەلدەرىنىڭ ازاماتتارىنا قاتىستى ينتەرنەت-الاياقتىقپەن اينالىسقان ترانسۇلتتىق قىلمىستىق توپتىڭ قىزمەتىن توقتاتتى، - دەپ حابارلايدى Aqshamnews.kz Polisia.kz-كە سىلتەمە جاساپ.
8 قىركۇيەكتە كۇدىكتى بىشكەكتە قولعا ءتۇستى. ونىڭ جالعا العان پاتەرىن ءتىنتۋ بارىسىندا 32 سلوتتى سيم-بوكس، ءۇشىنشى تۇلعالارعا تىركەلگەن 70-تەن استام SIM-كارتا، IP-ادرەس الماستىرۋعا ارنالعان قۇرىلعىلار، كومپيۋتەرلەر مەن تەلەفوندار تاركىلەندى.
الدىن الا مالىمەت بويىنشا، كۇدىكتى زاڭسىز ارەكەتتەرى ءۇشىن اپتاسىنا 500 اقش دوللارى كولەمىندە سىياقى الىپ وتىرعان. مۇنداي تەحنيكا ارقىلى قىلمىسكەرلەر بانكتەر، مەملەكەتتىك ورگاندار مەن ماركەتپلەيستەر اتىنان جاپپاي جالعان قوڭىراۋلار مەن حابارلامالار تاراتىپ، ازاماتتاردىڭ قاراجاتى مەن جەكە دەرەكتەرىن يەمدەنۋدى كوزدەگەن.
جىل باسىنان بەرى كيبەرقىلمىسقا قارسى ءىس-قيمىل دەپارتامەنتى 77 سيم-بوكستى جانە الاياقتار پايدالانعان 90 مىڭعا جۋىق SIM-كارتانى تاركىلەدى.
ەسكە سالايىق، 16 قىركۇيەكتەن باستاپ دروپتاردىڭ ارەكەتى ءۇشىن جاۋاپكەرشىلىك، ونلاين-نەسيە بەرۋدى شەكتەۋ جانە SIM-كارتالاردىڭ اينالىمىن رەتتەۋدى كوزدەيتىن جاڭا زاڭ نورمالارى كۇشىنە ەنەدى.