قىركۇيەكتە قاراعاندى، قوستاناي وبلىستارى مەن شىمكەنت قالاسىندا باستاۋ العان «كىتاپ وقيتىن ۇلت» جوباسىنىڭ العاشقى كەزەڭى ءوز مارەسىنە جەتتى.
«كىتاپ وقيتىن ۇلت» جوباسى – ەلىمىزدە تۇراقتى وقۋ مادەنيەتىن قالىپتاستىرۋعا باعىتتالعان اۋقىمدى زياتكەرلىك-اعارتۋشىلىق باستاما. نەگىزگى ماقساتى – كىتاپ وقۋدى ناسيحاتتاۋ، سىني ويلاۋدى دامىتۋ جانە كىتاپتى ءبىلىم، شابىت جانە زياتكەرلىك ءوسۋدىڭ نەگىزگى كوزى رەتىندە نىعايتۋ.
جوبا قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆتىڭ ۇلتتىق قۇرىلتايدىڭ III وتىرىسىندا ايتىلعان تۇجىرىمداماسى اياسىندا جۇزەگە اسىرىلادى جانە قازاقستاندى الەمدەگى ەڭ كوپ كىتاپ وقيتىن ون ەلدىڭ قاتارىنا شىعارۋدى كوزدەيدى.
ءبىر اي كولەمىندە 3 ايماقتان 189 221 ادام قاتىسۋعا ءوتىنىم بەردى.
قاراعاندى وبلىسى بويىنشا 67 438 قاتىسۋشى تىركەلسە، قوستاناي وبلىسى بويىنشا 55 281 ازامات ءوتىنىم بەرگەن. ال شىمكەنت قالاسىنان 66 502 ءوتىنىم كەلىپ ءتۇستى.
ونىڭ ىشىندە 6-10 سىنىپ ارالىعىنداعى 87 157 وقۋشى، 14 049 پەداگوگ، 2388 جەرگىلىكتى دەڭگەيدەگى مەملەكەتتىك قىزمەتشى، سونىمەن قاتار 36 553 وتباسى، 29 085 كوللەدج جانە جوعارعى وقۋ ورنى ستۋدەنتى قاتىسۋدا.
بايقاۋ قاتىسۋشىلارى «كىتاپ وقيتىن مەكتەپ»، «كىتاپ وقيتىن پەداگوگ»، «كىتاپ وقيتىن اۋلەت»، «كىتاپ وقيتىن كوللەدج»، «كىتاپ وقيتىن ۋنيۆەرسيتەت» جانە «كىتاپ وقيتىن مەملەكەتتىك قىزمەتكەر» نەگىزگى التى سانات بويىنشا سايىسقا تۇسپەك.
جوبانىڭ ەكىنشى كەزەڭىندە تىركەلگەن ءار قاتىسۋشى، بەكىتىلگەن تىزىمدەگى 15 كىتاپتى وقۋى كاجەت. ءار باعىت ءۇشىن ساراپشىلار مەن ءتيىستى سالانىڭ وكىلدەرى دايىنداعان ءتىزىم قاتىسۋشىلاردىڭ جاسى مەن قىزىعۋشىلىقتارىنا بەيىمدەلگەن، شىعارمالاردى تاڭداۋدا پاتريوتيزم، جاۋاپكەرشىلىك، بىلىمگە قۇشتارلىق، سىني ويلاۋ سياقتى قۇندىلىقتاردى دامىتۋعا باسا نازار اۋدارىلدى.
بۇل تىزىمدەرگە «قازاقستان ادەبيەتىنىڭ 100 تانىمال كىتابى» جالپىۇلتتىق داۋىس بەرۋ ارقىلى ىرىكتەلگەن شىعارمالار، الەمدىك ادەبيەتتىڭ ۇزدىك تۋىندىلارى جانە ۇلتتىق مادەني مۇرامىزدى ناسيحاتتايتىن شىعارمالار، سونداي-اق الەمدىك دەڭگەيدە مويىندالعان بەستسەللەرلەر ەندى.
ءار باعىت بويىنشا ەرەجەلەر مەن وقۋعا ۇسىنىلاتىن كىتاپتار ءتىزىمى www.reading-nation.kz سايتىندا جاريالانعان.
«كىتاپ وقۋ – مەنىڭ ءومىرىمنىڭ اجىراماس بولىگى. ايىنا كەم دەگەندە ەكى-ءۇش كىتاپ وقىماسام، ءوزىمدى تولىق سەزىنبەيمىن. «كىتاپ وقيتىن ۇلت» جوباسى سياقتى باستاما ءبىز سياقتى كىتاپقۇمار جاستارعا ۇلكەن مۇمكىندىك سىيلايدى. الداعى كەزەڭدە بايقاۋدىڭ جەڭىمپازى اتانۋ ءۇشىن بار كۇش-جىگەرىمدى سالامىن جانە بۇل جوبانىڭ وقۋ مادەنيەتىن دامىتۋعا قوسار ۇلەسى زور دەپ ەسەپتەيمىن»، - دەدى جوبا قاتىسۋشىسى قوستاناي وبلىسى №31 مەكتەبىنىڭ 10 سىنىپ وقۋشىسى راگيموۆا انەل.
«مەملەكەت باسشىسىنىڭ «كىتاپ وقيتىن ۇلت» باستاماسىن قولداۋ ارقىلى ازاماتتار اراسىندا كىتاپ وقۋعا دەگەن قىزىعۋشىلىقتى ارتتىرۋ جانە وقۋ مادەنيەتىن قالىپتاستىرۋ ماقساتىنداعى بۇل اۋقىمدى جوبا ەلىمىز ءۇشىن وتە ماڭىزدى. ءبىز ءارتۇرلى ساناتتاعى ازاماتتارمەن كەزدەسۋلەر وتكىزىپ، ءتۇسىندىرۋ جۇمىستارىن جۇرگىزگەندە ولاردان تەك وڭ پىكىرلەر ەستىدىك. جوباعا قاتىسۋعا نيەت بىلدىرۋشىلەر سانى وتە كوپ، ال جۇلدە قورى دا تارتىمدى. ەڭ باستىسى، بۇل جوبا ارقىلى ەلىمىزدە كىتاپ وقيتىن قاۋىمنىڭ سانى ارتىپ، وقۋ مادەنيەتى جاڭا دەڭگەيگە كوتەرىلەدى دەپ سەنەمىز»، - دەدى جوبا اۆتورى باقىتجان تۇرلىبەكوۆ.
جوبانى «كىتاپ وقيتىن ۇلت – چيتايۋششايا ناسيا» قوعامدىق قورى «امانات» پارتياسىنىڭ جانە قاراعاندى، قوستاناي وبلىس جانە شىمكەنت قالاسى اكىمدىكتەرىنىڭ قولداۋىمەن جۇزەگە اسىرۋدا. باس دەمەۋشى — Alageum Electric كومپانياسى.
بايقاۋدىڭ قورىتىندىسىن 2026 جىلعى ساۋىردە جاريالاۋ جوسپارلانىپ وتىر.