نارەستەلەرگە اقجۇرەك، اقنيەت، قاسيەت دەگەن ەسىم بەرىلدى.
تۇركىستان وبلىسىندا جىل باسىنان بەرى ءۇشىنشى ۇشەم دۇنيەگە كەلدى، دەپ حابارلايدى Almaty-akshamy.kz
تولەبي اۋدانى، لەڭگىر قالاسىنىڭ 36 جاستاعى تۇرعىنى اقبوتا قۇدايبەرگەنوۆا ەكى قىز، ءبىر ۇل بوساندى. سابيلەر بۇگىنگە دەيىن پەرينيتالدىق ورتالىق دارىگەرلەرىنىڭ باقىلاۋىندا بولعان. ءقازىر انا مەن نارەستەنىڭ جاعدايى ءبىرقالىپتى. وتاعاسى تەمىربەك تاجييەۆ قۇرىلىس سالاسىندا ەڭبەك ەتسە، وتاناسى اقبوتا قۇدايبەرگەنوۆا مەكتەپكە دەيىنگى ءبىلىم بەرۋ مەكەمەسىندە جۇمىس ىستەيدى. بۇعان دەيىن ەكى ۇلى مەن ءبىر قىزى بار وتباسى بىردەن 6 بالالى بولىپ، قۋانىشقا كەنەلىپ وتىر.
ەكى كۇن بۇرىن تۇركىستان وبلىسىندا 23 جاستاعى انا ۇشەم بوسانعان بولاتىن. ءۇش قىزعا رايانا، رازيا، رايحانا ەسىمى بەرىلگەن.