تۇركىستان وبلىسىندا جۇمىسشى ماماندىقتار جىلىنا وراي جەتى باعىت بويىنشا 64 ءىس-شارادان تۇراتىن كەشەندى جوسپار ازىرلەندى. ونىڭ باستى ماقساتى – كاسىبي ءبىلىم بەرۋدى دامىتۋ، جۇمىسشى ماماندىقتارىنىڭ بەدەلىن ارتتىرۋ جانە ەڭبەك نارىعىنىڭ سۇرانىسىن قامتاماسىز ەتۋ.
بۇگىندە وڭىردەگى 50 كوللەدجدە 47 مىڭنان استام ستۋدەنت 75 ماماندىق بويىنشا ءبىلىم الۋدا. ونىڭ ىشىندە 16 مىڭنان استامى – 38 جۇمىسشى كاسىپتى يگەرىپ جاتىر. جاڭا وقۋ جىلىنا بولىنگەن 15،5 مىڭ گرانتتىڭ 9،5 مىڭى ءدال وسى جۇمىسشى ماماندىقتارىنا باعىتتالعان.
كوللەدجدەردە دۋالدى وقىتۋ جۇيەسى قارقىندى دامىپ كەلەدى. ءقازىر 35 كوللەدج 650-دەن استام كاسىپورىنمەن كەلىسىمشارت جاساپ، ستۋدەنتتەردىڭ تەوريانى تاجىريبەمەن ۇشتاستىرىپ، ءوندىرىس ورىندارىندا ءبىلىمىن جەتىلدىرۋىنە جاعداي جاسالۋدا.
وبلىس اكىمىنىڭ ورىنباسارى بەيسەن تاجىبايەۆ بۇل باعىتتاعى جۇمىستاردىڭ ءمانىن اتاپ ءوتتى:
«ءبىز اكىمدىكپەن بىرلەسە وتىرىپ، جەتى باعىت بويىنشا 64 ءىس-شارادان تۇراتىن جول كارتاسىن جاسادىق. قازىرگى تاڭدا ونىڭ 18ء-ى جۇزەگە استى. مەكتەپتەر مەن كاسىبي باعدار بەرۋ ورتالىقتارىندا 790 ماماننىڭ شتاتتىق بىرلىگى بەكىتىلدى. مۇنىڭ بارلىعى جۇمىسشى ماماندىقتارىنىڭ مارتەبەسىن كوتەرۋگە باعىتتالعان»، – دەدى ول.
وڭىردە جاستاردى جۇمىسپەن قامتۋعا ارنالعان فورۋمدار مەن جارمەڭكەلەر وتكىزىلىپ كەلەدى. ماسەلەن، «ادال ازامات، ادال ەڭبەك، ادال تابىس» فورۋمىندا جۇزگە جۋىق تۇلەك ناقتى جۇمىسقا ورنالاستى. ال بوس جۇمىس ورىندارى جارمەڭكەسىندە جۇمىس بەرۋشىلەر 1،5 مىڭنان استام بوس ورىن ۇسىندى.
تۇركىستان وبلىسىندا ءبىلىم بەرۋ جۇيەسى دە جاڭارۋدا. «جايلى مەكتەپ» جوباسى اياسىندا 29 جاڭا وقۋ ورنى سالىنۋدا. بيىلدىڭ وزىندە 13 مەكتەپ پايدالانۋعا بەرىلدى، جىل سوڭىنا دەيىن تاعى 16 مەكتەپ اشىلادى. سونىمەن قاتار، 115 مەكتەپ جاڭعىرتۋدان وتكىزىلىپ، ونىڭ 100-ىندە جوندەۋ جۇمىستارى اياقتالدى.
بارلىق مەكتەپتەر جەدەل باسقارۋ ورتالىعىنا قوسىلدى. وندا تۋرنيكەتتەر، دابىل تۇيمەلەرى ورناتىلىپ، قاۋىپسىزدىك شارالارى كۇشەيتىلدى. قازىرگى تاڭدا وڭىردە 67 مىڭنان استام پەداگوگ ەڭبەك ەتەدى. ولاردىڭ ىشىندە 1 200-دەن استامى «ءبىلىم بەرۋدەگى 1000 كوشباسشى» جوباسىنا قاتىسىپ، كوپشىلىگى باسشىلىق قىزمەتتەرگە تاعايىندالدى. جىل سوڭىنا دەيىن تاعى 16 مىڭ ءمۇعالىمنىڭ بىلىكتىلىگىن ارتتىرۋ جوسپارلانسا، ۇلتتىق «ۇستاز» پلاتفورماسىندا 13 مىڭعا جۋىق پەداگوگ اتتەستاسيادان وتۋدە.
تۇركىستان وبلىسىندا جۇمىسشى ماماندىقتارىنىڭ مارتەبەسىن ارتتىرۋ، جاستارعا جاڭا مۇمكىندىكتەر بەرۋ جانە ءبىلىم بەرۋ جۇيەسىن جاڭعىرتۋ باعىتىنداعى جۇمىستار دايەكتى تۇردە جالعاسىپ كەلەدى. بيلىك وكىلدەرىنىڭ ايتۋىنشا، بۇل قادامدار ءوڭىردىڭ الەۋمەتتىك-ەكونوميكالىق دامۋىنا تىڭ سەرپىن بەرمەك.