تۇركىستان وبلىسىندا ەكى تاۋلىك بويى ىزدەستىرىلگەن ءجاسوسپىرىم الماتىدان تابىلدى

تۇركىستان وبلىسىنىڭ پوليسەيلەرى جوعالعان ءجاسوسپىرىمدى الماتىدان تاپتى.

جەتىساي پوليسيا بولىمىنە تۇنگى ساعات 03:00 شاماسىندا جىلىسۋ اۋىلىنىڭ تۇرعىنى 102 ءنومىرى ارقىلى حابارلاسقان. ايتۋىنشا، 13 جاستاعى بالاسى ۇيدەن بەلگىسىز باعىتقا شىعىپ كەتىپ، قايتا ورالماعان. اناسى بالاسىن ىزدەپ جۇرگەنىنە 2 تاۋلىك بولعان. ناتيجە شىقپاعان سوڭ، پوليسەيلەردىڭ كومەگىنە جۇگىنگەن، دەپ حابارلايدى Almaty-akshamy.kz Polisia.kz-كە سىلتەمە جاساپ.

جەتىسايلىق پوليسەيلەر حابارلاما تۇسە سالىسىمەن، تەز ارادا ارەكەت ەتىپ، وقيعا ورنىنا جەتتى. جوعالعان بالانى تابۋ ماقساتىندا قاجەتتى دەپ تانىلعان بارلىق جەدەل ىزدەستىرۋ جۇمىستارىن ۇيىمداستىردى. اۋدان كوشەلەرىن تەكسەرىپ، كورگەن-بىلگەن تۇرعىنداردان سۇراستىرۋ جۇمىستارى جۇرگىزىلدى. ناتيجەسىندە پوليسەيلەر تاۋلىك ىشىندە بالانى الماتى قالاسىنداعى تۋىسقانىنىڭ ۇيىنەن تاپتى.

بەلگىلى بولعانداي، جوعالعان بالا وتباسىنداعى داۋ-دامايعا بايلانىستى ۇيىنەن كەتىپ قالعان. قازىرگى تاڭدا ءجاسوسپىرىم بالا ۇيىنە قايتارىلدى. ۇلىمەن امان-ەسەن قاۋىشقان انا بالانى ىزدەستىرۋدە شاپشاڭدىقپەن ارەكەت ەتكەن پوليسيا قىزمەتكەرلەرىنە العىسىن ايتىپ، ريزاشىلىعىن ءبىلدىردى.

«مەنىڭ بالام تۇسكى ۋاقىتتا بەلگىسىز باعىتقا شىعىپ كەتىپ، قايتا ورالمادى. ءوزىم ىزدەپ تابا الماعان سوڭ، پوليسەيلەردەن كومەك سۇرادىم. ال جەتىساي اۋدانىنىڭ پوليسەيلەرى بالامدى دەر كەزىندە تاۋىپ بەردى. پوليسيا قىزمەتكەرلەرىنە كوپ راقمەتىمدى ايتامىن»، – دەدى تۇرعىن.