ءبىلىم جانە اۋىل شارۋاشىلىعى سالاسىنىڭ جۇمىسكەرلەرىنە جوعارى سۇرانىس بايقالدى.
2022 جىلدىڭ قىركۇيەك ايىندا ەلەكتروندىق ەڭبەك بيرجاسىندا 115،6 مىڭ بوس جۇمىس ورنى جانە 82،3 مىڭ تۇيىندەمە ورنالاستىرىلدى. وتكەن ايمەن سالىستىرعاندا، بوس ورىندار سانى 3،6%-عا، ال وزەكتى تۇيىندەمەلەر سانى 12،4%-عا ازايدى. جالپى، بوس جۇمىس ورىندارىنىڭ سانى تۇيىندەمە سانىنان 29%-عا اسىپ ءتۇستى، دەپ حابارلايدى Almaty-akshamy.kz.
«قىركۇيەك ايىنىڭ قورىتىندىسى بويىنشا، ەەب-دا ورنالاستىرىلعان تۇيىندەمەلەر سانى 11،7 مىڭعا ازايدى، ولاردىڭ باسىم بولىگى جوعارى بىلىكتى قىزمەتكەرلەرگە تيەسىلى. ونىڭ ىشىندە، تامىزبەن سالىستىرعاندا، ءبىلىم بەرۋ سالاسى ماماندارىنىڭ ۇسىنىستارى ايتارلىقتاي قىسقاردى، تۇيىندەمە سانى 8،7 مىڭعا ازايدى. بۇل رەتتە بىلىكتىلىگى جوق قىزمەتكەرلەر تاراپىنان ۇسىنىستار سانى ءوستى. وسى ساناتتاعى ىزدەنۋشىلەر سانى الدىڭعى ايمەن سالىستىرعاندا ارتىپ، 2،4 مىڭ تۇيىندەمەنى قۇرادى»، – دەدى «ەڭبەك رەسۋرستارىن دامىتۋ ورتالىعى» اق باسقارۋشى ديرەكتورى الەكساندرا مولچانوۆسكايا.
ساراپشى قىركۇيەكتە ەڭبەك نارىعىنداعى مامانداردىڭ جوعارى تاپشىلىعى الماتى (بوس ورىندار سانى تۇيىندەمە سانىنان 7،4 مىڭعا كوپ) جانە استانا (5،2 مىڭ) قالالارىنا، سونداي-اق قوستاناي (6،6 مىڭ) جانە قاراعاندى (6،5 مىڭ) وبلىستارىنا ءتان ەكەنىن حابارلادى.
ال كاسىپتىك سالالار بولىنىسىندە ءبىلىم بەرۋ جانە تاربيە (7،5 مىڭ)، قۇرىلىس (6،1 مىڭ) جانە ءوندىرىس (5،4 مىڭ) سالالارىنىڭ ماماندارى اراسىندا قاتتى تاپشىلىق بايقالدى.
قىركۇيەك ايىندا ءبىلىم بەرۋ سالاسىنىڭ ماماندارى ۇلكەن سۇرانىسقا يە بولدى، ولار ەەب-داعى بارلىق بوس جۇمىس ورىندارىنىڭ بەستەن ءبىر بولىگىنەن استامىن قۇرادى – 24،8 مىڭ. بۇل رەتتە كەيبىر وڭىرلەردە وسى سالادا مامانداردىڭ جەتىسپەۋشىلىگى بايقالادى. وسىلايشا، كادر تاپشىلىعى قاراعاندى وبلىسىندا (1،4 مىڭ) جانە الماتى قالاسىندا (1،3 مىڭ) تىركەلدى.
قىركۇيەكتە، وتكەن ايمەن سالىستىرعاندا، بوس ورىندار سانىنىڭ سەرپىنى ايتارلىقتاي وزگەردى: 7 وڭىردە بوس ورىندار سانى جيىنتىعىندا 5،6 مىڭعا ءوستى، ال باسقا 10 وڭىردە 10 مىڭ بوس ورىنعا تومەندەۋ بايقالدى. بوس ورىنداردى تومەندەتۋ بويىنشا ەڭ جوعارى كورسەتكىشتەردى قاراعاندى (2 مىڭ بوس ورىن)، الماتى (1،6 مىڭ بوس ورىن) جانە اتىراۋ وبلىسى (1،5 مىڭ بوس ورىن) كورسەتەدى. تۇركىستان وبلىسى (2،4 مىڭ بوس ورىن) جانە الماتى قالاسى (1،6 مىڭ بوس ورىن) بوس ورىندار سانىنىڭ ەڭ كوپ وسكەنىن كورسەتتى.
وتكەن ايمەن سالىستىرعاندا، وڭىرلەر بولىنىسىندە ىزدەنۋشىلەر سانىنىڭ سەرپىنى پاۆلودار جانە باتىس قازاقستان وبلىستارىن قوسپاعاندا، بارلىق وڭىرلەر بويىنشا تومەندەگەنىن كورسەتتى. ىزدەنۋشىلەر اراسىندا بەلسەندىلىكتىڭ ەڭ كوپ تومەندەۋى الماتى وبلىسىندا (2،7 مىڭ تۇيىندەمە) جانە الماتى قالاسىندا (2،2 مىڭ تۇيىندەمە) تىركەلدى.
قىركۇيەك ايىندا، وتكەن ايمەن سالىستىرعاندا، جوعارى بىلىكتى قىزمەتكەرلەرگە سۇرانىس 16%-عا نەمەسە 6،5 مىڭعا تومەندەپ، 33،6 مىڭ بوس ورىندى قۇرادى. بۇل رەتتە بىلىكتىلىگى تومەن (5،1% نەمەسە 1،5 مىڭ) جانە بىلىكتىلىگى ورتاشا قىزمەتكەرلەرگە (1،1% نەمەسە 0،5 مىڭ) سۇرانىستىڭ ارتۋى بايقالادى، ولار بويىنشا بوس ورىندار سانى تيىسىنشە 31،9 جانە 50،1 مىڭدى قۇرادى.
«ۇسىنىس تاراپىنان دا وسىنداي جاعداي بايقالادى – جوعارى بىلىكتى جۇمىسكەرلەر اراسىنان ىزدەنۋشىلەر سانى تورتتەن بىرىنە ازايىپ، 29 مىڭ تۇيىندەمەنى قۇرادى، ورتاشا بىلىكتى جۇمىسكەرلەر اراسىندا – 8%، 26،1 مىڭ تۇيىندەمەنى قۇرادى، ال تومەن بىلىكتى جۇمىس ىزدەۋشىلەر سانى 1،7%-عا ارتىپ، 27،2 مىڭ تۇيىندەمەنى قۇرادى»، – دەدى الەكساندرا مولچانوۆسكايا.
ماماندارعا سۇرانىس ارتقان كاسىبي سالالاردىڭ ىشىندە الەۋمەتتىك قىزمەت كورسەتۋ سالاسىن (19% نەمەسە 171 بوس جۇمىس ورنى)، عىلىم مەن كونسالتينگتى (18،5% نەمەسە 128 بوس جۇمىس ورنى) جانە زاڭ عىلىمىن (18% نەمەسە 96 بوس جۇمىس ورنى) اتاپ وتۋگە بولادى.
جالاقى دەڭگەيلەرى وڭىرلەردە دە، كاسىپتەر اراسىندا دا ەرەكشەلەنەدى. الدىڭعى ايداعىداي، بۇل جولى دا ۇسىنىلاتىن ەڭبەكاقىنىڭ ەڭ كوپ مولشەرى اتىراۋ وبلىسىندا بايقالدى، وسى وڭىردە ورتاشا جالاقىسى 764 مىڭ تەڭگە بولاتىن 21 بوس ورىن ورنالاستىرىلدى.
اسا جوعارى جالاقىنى ىزدەۋشىلەر قاتارىندا ساقتاندىرۋ ساراپشىلارى جانە عىلىمي قىزمەتكەرلەر 2 ملن تەڭگە ەڭبەكاقىنى قالاپ، سونداي-اق قۇرىلىمدىق بولىمشەلەردىڭ باسشىلارى مەن ديرەكتورلار 1،5 ملن تەڭگەدەن 2 ملن تەڭگەگە دەيىن جالاقىعا سۇرانىس بىلدىرۋدە.
«جالپى، قىركۇيەك ايىندا بوس ورىندار مەن تۇيىندەمەلەر سانىنىڭ ءبىرشاما تومەندەۋى بايقالادى. بۇل رەتتە ءبىلىم جانە اۋىل شارۋاشىلىعى سالاسىنىڭ جۇمىسكەرلەرىنە سۇرانىستىڭ ماۋسىمدىق تۇرعىدان ءوسۋى كورىنىس تابۋدا»، – دەپ قورىتىندىلادى الەكساندرا مولچانوۆسكايا.