بيىكتىگى 8-9 مەتر بولاتىن اعاشقا 6 ادامنىڭ قۇشاعى ازەر جەتەدى
تۇركىستان وبلىسىندا 1000 جىلدىق تۇت اعاشى ءبۇر جاردى. التى ادامنىڭ قۇشاعى ارەڭ جەتەتىن اعاشتىڭ ءتۇبى قۋراپ كەتكەنىمەن، توبەسىندەگى بۇتالارى جاپىراق اشىپ، كوگەرىپ تۇر، دەپ حابارلايدى Almaty-akshamy.kz قازاقپاراتقا سىلتەمە جاساپ.
1000 جىلدىق تۇت اعاشى تۇركىستان قالاسىنان 30 شاقىرىم جەردەگى قارناق اۋىلىندا ورنالاسقان.
جەرگىلىكتى تۇرعىندار ونى ءماجارات تۇت دەپ اتايدى. بيىكتىگى 8-9 مەتر بولاتىن اعاشقا 6 ادامنىڭ قۇشاعى ازەر جەتەدى.
«جالپى بۇل اعاش تۋرالى بىرنەشە ءاڭىز-اپسانا بار. سونىڭ بىرىندە Vءىىى عاسىردا يسلام ءدىنىن ورتا ازيا ەلدەرىنە تاراتۋعا كەلگەن اراب قولباسشىسى كۋتەيبا يبن مۋسليم وتىرعىزعانى ايتىلادى. ال، ەكىنشى نۇسقادا يمام باحلي ەسىمدى ءدىندار كىسى جىلقى بايلاۋ ءۇشىن، جەرگە قاققان دەگەن اعاش كوگەرىپ، ءوسىپ شىققان دەگەن دەرەك بار. ال، كەي ءاپسانالاردا پايعامبارىمىزدىڭ (س.ع.س.) ساحابالارى وسى ماڭنان وتكەندە بۇلاق باسىنا تىرەپ قويعان اسا تاياعى قالىپ كەتكەن دەسەدى»، - دەيدى شىراقشى ابدۋلاتيپ سمايلوۆ.
ءقازىر اعاشتىڭ ءتۇبىرى قۋراپ كەتسە دە، شىبىقتارى كوگەرىپ، جاپىراق اشىپ تۇر.
ال، ورتاسى ۇشكە بولىنگەن. اۋىر تارتقان بولىكتەرىن تۇرعىندار ارنايى اعاشتارمەن تىرەپ قويىپتى.
سوڭعى كەزدە الىپ اعاشتى ارنايى كورۋ ءۇشىن ەلىمىزدىڭ تۇكپىر-تۇكپىرىنەن ارنايى كەلەتىندەر كوبەيگەن.
ءتىپتى شەت ەلدەن كەلىپ جاتقاندار دا بار ەكەن. بارشاسى تۇت اعاشىنىڭ باسىندا قۇران وقىپ، تىلەك تىلەيدى.
ابدۋلاتيپ سمايلوۆتىڭ ايتۋىنشا، اۋىلدا مۇنداي تاريحي ەكى تۇت اعاشى بولعان ەكەن. بىرەۋىن اۋىل بالالارى ويناپ ءجۇرىپ، ورتەپ جىبەرىپتى.
ال، ەكىنشىسىن جەرگىلىكتى تۇرعىندار قامقورلىققا الىپ، قورشاپ قويعان. ارنايى قۇدىق قازىپ، ارىق تارتقان.
«كوپتەگەن جىلدار بويى سۋارىلماي قالدى. سودان قۋراپ كەتكەن بولاتىن. ءقازىر سۋ كەلىپ تۇر. ءجيى-جيى سۋارىپ تۇرامىز. ءبۇر جارىپ، كوك الا باستاعان كورىپ، قۋانىپ ءجۇرمىز. بۇل دا ءبىر جاقسىلىقتىڭ نىشانى بولار» - دەيدى ول.