2023 جىلى وتاندىق جيھاز ونەركاسىبىنە ينۆەستيسيا كولەمى 17،1 ملرد تەڭگەگە جەتتى. بۇل 2022 جىلمەن سالىستىرعاندا ءتورت ەسەگە جوعارى كورسەتكىش (4،4 ملرد تەڭگە).
جيھاز ونەركاسىبىنە ينۆەستيسيا تارتۋ بويىنشا تۇركىستان وبلىسى كوش باستاپ تۇر. وتكەن جىلى وسى ءوڭىردىڭ جيھاز ونەركاسىبىنە 13،2 ملرد تەڭگە ينۆەستيسيا سالىنىپ، رەسپۋبليكالىق دەڭگەيدىڭ 76،8 پايىزىن قۇرادى، دەپ حابارلايدى Almaty-akshamy.kz ونەركاسىپ جانە قۇرىلىس مينيسترلىگىنە سىلتەمە جاساپ.
بۇل تۋرالى «QazIndustry» اق جەڭىل ونەركاسىپ، اعاش وڭدەۋ، جيھاز ونەركاسىبىن جانە قۇرىلىس ماتەريالدارى ءوندىرىسىن دامىتۋ ديرەكسياسى حابارلادى.
ۇلتتىق ستاتيستيكا بيۋروسىنىڭ مالىمەتىنشە، 2022 جىلى تۇركىستان وبلىسىندا وسى سالاعا 1،4 ملرد تەڭگە ينۆەستيسيالانعان. وتكەن جىلعى كورسەتكىشپەن سالىستىرعاندا، ءبىر جىلدا سالاداعى ينۆەستيسيا كولەمى توعىز ەسەدەن استام (9،1) ءوسىم كورسەتىپ وتىر. مۇنداي جوعارى كورسەتكىشتەر كەڭسەلەر مەن ساۋدا كاسىپورىندارى ءۇشىن جيھاز وندىرىسىنە (+5،8 ەسە - 6،3 ملرد تەڭگەگە دەيىن) جانە باسقا دا جيھازدارعا (+18،9 ەسە - 6،9 ملرد تەڭگەگە دەيىن) ينۆەستيسيالار كولەمىن ارتتىرۋدىڭ ارقاسىندا مۇمكىن بولدى.