تۇركىستان قالاسىندا «تۇركىستان – تۇركى الەمىنىڭ تۋريستىك استاناسى» حالىقارالىق تۋريستىك فورۋمى ءوتتى.
فورۋمنىڭ باستى ماقساتى – ءوزارا ءتيىمدى ىنتىماقتاستىق ورناتۋ جانە تۇركىستان قالاسىن 2024 جىلعى تۇركى الەمىنىڭ كەلەسى تۋريستىك استاناسى رەتىندە تانىستىرۋ، دەپ حابارلايدى اlmaty-akshamy.kz.
فورۋمنىڭ اشىلۋ سالتاناتىندا ق ر تۋريزم جانە سپورت ۆيسە-مينيسترى ەرجان ەركىنبايەۆ، تۇركىستان وبلىسىنىڭ اكىمى دارحان ساتىبالدى جانە تۇركى مەملەكەتتەرى ۇيىمى باس حاتشىسىنىڭ ورىنباسارى ميرۆوحيد ازيموۆ ءسوز سويلەدى. سونىمەن قاتار ءىس-شاراعا تۇركى ەلدەرىنىڭ تۋريستىك اكىمشىلىكتەرىنىڭ، ورتالىق جانە جەرگىلىكتى مەملەكەتتىك ورگانداردىڭ، تۋريندۋستريا مەن قازاقستاننىڭ قوعامدىق بىرلەستىكتەرىنىڭ وكىلدەرى قاتىستى. ايتا كەتۋ كەرەك، ءبىر كۇن بۇرىن تمۇ تۋريزم ماسەلەلەرىنە جاۋاپتى مينيسترلەرىنىڭ VIII وتىرىسى ءوتتى. وندا تۇركىستاندى 2024 جىلعى تۇركى الەمىنىڭ تۋريستىك استاناسى دەپ جاريالاۋ تۋرالى باستاما ماقۇلداندى. جوعارىدا اتالعان ءىس-شارالار بارىسىندا ءبىرقاتار باستامالار تالقىلانىپ، تۇركى الەمى ەلدەرىندەگى تۋريستىك سەكتوردى ودان ءارى دامىتۋعا باعىتتالعان كەشەندى شارالار ۇسىنىلدى.
بىرىنشىدەن، تمۇ-عا مۇشە مەملەكەتتەر مەن باقىلاۋشى مەملەكەتتەردىڭ ءىرى قالالارى اراسىنداعى اۋەرەيستەر سانىنىڭ ارتۋى.
ەكىنشىدەن، بىرلەسكەن تۋريستىك ونىمدەردى ازىرلەۋ، سەرىكتەستىك قاتىناستاردى جولعا قويۋ بويىنشا جۇمىستاردى جانداندىرۋ جانە «جىبەك جولى» زاماناۋي تۋريستىك مارشرۋتىن دامىتۋ.
ۇشىنشىدەن، قازاقستان مەن وزبەكستان اراسىنداعى «تاباررۋك ءزيورات» پيلوتتىق جوباسىن نەعۇرلىم تىعىز دامىتۋدى جالعاستىرۋ.
تورتىنشىدەن، سالاۋاتتى ءومىر سالتىن ناسيحاتتاۋ، مادەني الماسۋ جانە تۋريستىك اعىمدى ىنتالاندىرۋ ماقساتىندا تمۇ ەلدەرى اراسىندا جۇگىرۋ بويىنشا مارافوندار اليانسىن قۇرۋ ۇسىنىلدى.
بەسىنشىدەن، تۋريزم جانە مەيماندوستىق بويىنشا وقىتۋعا مامانداندىرىلعان تمۇ ۋنيۆەرسيتەتتەر ليگاسىن قۇرۋ. بۇل تۋريزم سالاسىنداعى تابىستى مانساپ ءۇشىن ماڭىزدى بولىپ تابىلاتىن ستۋدەنتتەردىڭ كاسىبي دەڭگەيىن ارتتىرۋعا ىقپال ەتەدى.
التىنشىدان، تمۇ ەلدەرىنىڭ تۋريستىك الەۋەتىن ىلگەرىلەتۋ جانە ماركەتينگ بويىنشا تاجىريبە الماسۋدى كۇشەيتۋ.
«تمۇ كەڭىستىگىندەگى ماڭىزدى باستامالاردىڭ ءبىرى «تۇركى الەمىنىڭ تۋريستىك استاناسى» باستاماسى بولدى. بۇل باستاما ۇلى جىبەك جولى بويىنداعى قالالاردىڭ تۋريستىك الەۋەتىن اشۋعا مۇمكىندىك بەرەدى جانە ءبىر-بىرىنىڭ مادەني جانە ءداستۇرلى قۇندىلىقتارىن ءبىلۋ ارقىلى بارلىق تۇركى ەلدەرى حالىقتارىنىڭ جاقىنداسۋىنا ىقپال ەتەدى. تۇرلەنگەن تۇركىستان تۇگەل تۇركى الەمى العا قويعان ورتاق ماقساتتاردى جۇزەگە اسىرۋدا، ناسيحاتتاۋعا ەلەۋلى ۇلەس قوساتىنىنا نىق سەنىمدىمىن،» - دەدى ق ر تۋريزم جانە سپورت ۆيسە-مينيسترى ەرجان ەركىنبايەۆ.