ولار وسى ۋاقىتقا دەيىن 7 ءتىرى ادامدى تاپتى.
پرەزيدەنت قاسىم-جومارت توقايەۆ تۇركياعا بارعان قۇتقارۋشىلاردىڭ مەملەكەتتىك ناگراداعا ۇسىنىلاتىنىن مالىمدەدى، دەپ حابارلايدى Almaty-akshamy.kz اقورداعا سىلتەمە جاساپ.
بۇگىن مەملەكەت باسشىسى قۇتقارۋشىلاردى دايىندايتىن مالىك عابدۋللين اتىنداعى ازاماتتىق قورعاۋ اكادەمياسىنا باردى. كۋرسانتتاردىڭ الدىندا ءسوز سويلەگەن توقايەۆ تۇركياداعى ءزىلزالادان كەيىن قۇتقارۋ شارالارىنا قاتىسىپ جاتقان قازاقستاندىق مامانداردىڭ مەملەكەتتىك ناگراداعا ۇسىنىلاتىنىن ايتتى.
"جاقىندا تۇركيادا جويقىن جەر سىلكىنىسى بولعانىن بىلەسىزدەر. مەنىڭ تاپسىرماممەن باۋىرلاس تۇركيا ەلىنە قۇتقارۋشىلار جانە دارىگەرلەر جىبەرىلدى. ولاردىڭ اراسىندا اقمولا وبلىسىنىڭ ماماندارى دا بار، ياعني 18 ادام. ءبىزدىڭ قۇتقارۋشىلار بىرنەشە ادامدى امان الىپ شىقتى. تۇركيادا كۇندىز-تۇنى جۇمىس ىستەپ جاتقان ازاماتتارىمىزعا العىس ايتامىن! تۇركيادان امان-ەسەن ورالعان سوڭ ولاردى مىندەتتى تۇردە ماراپاتتايمىز"، - دەدى توقايەۆ.
ايتا كەتەرى، تۇركياعا الدىمەن ءبىرىنشى ەشەلونمەن 41 قازاقستاندىق قۇتقارۋشى باردى. ودان كەيىن تاعى 60 مامان ءزىلزالادان كەيىنگى قۇتقارۋ شارالارىنا اتتاندى. وسى ۋاقىتقا دەيىن ولار 7 ءتىرى ادامدى تاپتى. بۇدان بولەك، قايتىس بولعان 80 ادامنىڭ دەنەسىن الىپ شىقتى.